Extra | Eks minister plenipotensiario a laga Kas di Kòrsou den estado ku no por a habitá

Kas di Kòrsou bende 1.2 mion euro ménos ku su balor | Extra

WILLEMSTAD.- Minister enkargá ku Tráfiko, Transporte i Planifikashon Urbano, Sra. Zita Jesus-Leito a indiká ku for di 2016 ku eks Minister plenipotensiario sra. Marvelyne Wiels a sali for di Kas di Kòrsou, niun di e tres ministernan siguiente no por a habitá e kas.

Esaki ta indikashon klaramente ku sra. Wiels lo a laga e kas den un estado hopi deplorabel ku no por habitá. Pa drecha e kas, mester di 30 mil euro.

Sra. Jesus-Leito den su introdukshon ayera riba benta di edifisionan di Kas di Kòrsou, a bisa ku aktualmente gobièrnu ta konfrontando un kaso sivil den korte di promé instansia na Ulanda pa ku benta di e tres edifisionan di Kas di Kòrsou na Ulanda, Den Haag. Sra. Wiels ku aprobashon di konseho di minister bou di gabinete Whiteman a sera akuerdo pa bende e edifisionan di Kas di Kòrsou.

Un historia chikí di e kasnan ta mustra ku dia 7 sèptèmber 1955 gobièrnu di Antia Ulandes a kumpra e edifisio na Badhuisweg 175. Kuater aña despues, 15 ougùstùs 1959 a pasa e akto notarial pa atkisishon di Badhuisweg 173 i 173A. E dos edifisionan for di momentu di nan kompra a fungi komo kantor di gabinete di minister plenipotensiario di Antia i for di 10-10-10 ofisina di minister plenipotensiario di Kòrsou.

Dia 22 di mart 1966 gobièrnu di Antia a kumpra e manshon na Wagenaarweg 3 ku a sirbi komo residensia ofisial di minister plenipotensiarionan di Antia i despues e minister plenipotensiario di Kòrsou.

Na 2014 sra. Wiels a husga ku Badhuisweg 173 i 173 A i 175 no por sirbi mas komo alohamentu pa kas di Kòrsou pasobra nan estado tabata laga di deseá. Pa e motibu ei el a disidí pa bandoná e edifisionan na Badhuisstraat i a hür edifisio na Wagenaarstrat. E gabinete Asjes a duna pèrmit pa sra. Wiels muda na aprel 2014. Esaki a nifiká ku for di 1 mei 2014, 3 kantornan histériko di anteriormente Kas di Antia i awor Kas di Kòrsou a keda inhabitá.

Sra. Wiels a keda biba den e kas na Wagenaar te na 2016 komo minister plenipotensiario. Despues ku sra. Wiels a bai for di Wagenaarweg 3 a keda inhabitá, no opstante ku entre tantu tres persona a fungi tal posishon di minister plenipotensiario for di novèmber 2016 te ku awor. sra. Wiels a bai laga e residensia di tal forma ku e ministernan nobo no por a biba aden.

Resientemente minister plenipotensiario Sr. Begina a buska oferta di 3 kontratista pa haña idea kon por drecha Wagenaarweg 3 ku por biba aden atrobe. Segun kalkulo ku a ser hasi, mester invertí 30 mil euro pa drecha e kas aki.

Bron: Extra

Kas di Kòrsou bende 1.2 mion euro ménos ku su balor

Kas di Kòrsou bende 1.2 mion euro ménos ku su balor | Extra

WILLEMSTAD.- Minister Zita Jesus-Leito a duna un relato amplio kon benta di e tres edifisionan di Kas di Kòrsou a tuma lugá na Ulanda dor di eks minister plenipotensiario sra. Marvelyne Wiels. El a bende e kasnan pa un balor mas abou di loke nan tabata bal.

Sra. Jesus-Leito a splika ku for di último lunanan di 2014 bou di gabinete Asjes, Sra. Wiels a kuminsá e proseso pa bende e edifisionan bieu na Badhuisweg i kumpra otro edifisio ku mester a sirbi komo kantor di kas di Kòrsou. Den un karta fechá 7 oktober 2014 ku sra. Wiels a manda pa eks promé minister Asjes, e ta pidi pa haña dispensashon di reglanan di destaho públiko pa e por traha ku un makelaar pa tantu benta dje edifisionan bieu i kompra di edifisionan nobo.

Konseho di minister a konsedé petishon di Sra. Wiels. Sra. Wiels a drenta den areglo ku un kompania di makelaar pa nan asesor’é pa bende edifisionan na Badhuisweg i Wagenaarweg i pa kumpra edifisio na Prinsengracht 63 pa 65 kaminda Kas di Kòrsou ta aktualmente. No opstante ku na 2014 ministerio di finansa a konsehá gobièrnu promé ku kumpra un edifisio nobo, mester bende esnan bieu i ku previo na e benta Parlamento mester duna su aprobashon. Pero dia 28 di sèptèmber 2015 ku outorisashon di gabinete Whiteman, sra Wiels a firma akuerdo ku dos kompania priva pa bende e kasnan di Kòrsou.

Previo na esaki na yüli 2015 sra. Wiels a kumpra edifisio na Prinsegracht i Kas di Kòrsou a muda pa edifisio nobo.

E akuerdo di benta di tereno i edifisionan a kontené un klóusula ku si Parlamento no aprobá pa e benta promé ku 15 desèmber 2015, gobièrnu di Kòrsou tin e derecho di revoká e areglo. Na mes momentu a palabra ku si pa desèmber 2015 si no tende nada di parlamento, partidonan por drenta negoshashon ku otro i tambe wak asina si por alargá ku tres luna e término pa hasi e traspaso di e bienesnan.

Na yüli 2016 konseho di minister a disidí pa wanta e desishon pa manda e aprobashon di benta pa Parlamento.

E periodo ku ta papia di dje for di yüli 2016 tabatin un elekshon pendiente, formashon di algun luna, seguidamente 23 desèmber un gobièrnu nobo a sinta, i apénas despues di 6 siman e gobièrnu di Koeiman a kai dia 12 febrüari 2017. A sigui gobièrnu interino ku a bira demishonario despues di elekshon. Tabata un periodo di hopi intrankilidat i no tabata oportuno pa konsulta ku Parlamento riba benta di e edifisionan na Ulanda.

E akuerdo di benta di 28 sèptèmber 2015 a brinda espasio pa alargá e espasio di traspaso di bienesnan den konsenso mutuo. Esaki a sosodé 5 biaha te ku 15 mart 2017.

Dia 15 yüni 2017 e término nobo lo a vense i previo na e vensementu, gabinete Rhuggenaath a aserká e kumpradónan pidiendo nan kolaborashon pa un alargashon. Nan a ninga di duna esaki, i a anunsiá ku lo bai korte ku gobièrnu.
Pa evitá ku e edifisionan i terenonan lo a bira propiedat di kumpradónan, gobièrnu den un karta ku a manda pa e kumpradónan fechá 14 yüni 2017, a anunsiá su desishon pa disolvé e akuerdo di benta e tempu aya.

Dia 28 ougùstùs último abogado di Kas di Kòrsou a haña dagvaarding pa un kaso sivil kontra gobièrnu di Kòrsou den korte di promé instansia na Den Haag, ku ta eksigiendo inkumplimentu di parti di gobièrnu, ta pidi un multa di 8625 euro pa dia ku lo kana te dia di entrega di tereno i edifisionan i tambe ta pidi entrega di propiedatnan. E multa a kuminsá kana dia 23 ougùstùs último.

Di 1 sèptèmber direktor di kas di Kòrsou a sinta na nòmber di minister plenipotensiario i gobièrnu a sinta huntu ku abogado di gobièrnu na Ulanda i kumpradónan di Ulanda ku nan abogadonan i a palabrá ku pendiente desishon di Parlamento lo pone un moratorio riba e multa, esta lo par’e un ratu. E moratorio a vense ayera 26 sèptèmber.

Dia 23 ougùstùs último a base di konseho di minister plenipotensiario sr. Begina, konseho di minister a disidí pa someté na huisio di Parlamento benta di e kasnan i tambe a enkargá SOAB pa hasi investigashon riba transakshon di benta. Tambe konseho di minister a pidi pa laga balorá e balor aktual i balor dje edifisionan na 2015.

Resultado di taksashon segun nivel di merkado e tres edifisionan bieu bal 4 mion 5 mil euro i na 2015 nan tabata bal 4 mion euro, i e kontrato di benta a bai pa 2.8 mion euro. Pues un diferensia di 1.2 mion ménos ku e balor.

Parlamento por disidí sea ta bende propiedatnan na Ulanda òf no ta bende nan. Mester tuma un desishon si e benta ta bai dor pa e suma palabrá na 2015 di 2 mion 875 mil euro òf ta drenta den negosashon pa ahuste di preis, si mira taksashon ku na 2015 e propiedatnan tabata bal mas ku e dil ku a sera, sra. Jesus-Leito a terminá su presentashon.

Bron: Extra

Parlamento a para benta edifisionan di Kas di Kòrsou na Den Haag

Parlamento a para benta edifisionan di Kas di Kòrsou na Den Haag | Extra

WILLEMSTAD.- Parlamento den su totalidat ayera a bai di akuerdo ku moshonnan ku a subi mesa pa entre otro para benta di e edifisionan di kas di Kòrsou na Badhuisweg i Wagenaarweg. Den mesun rosea a pidi tambe pa Kontrolaria General investigá henter e proseso di benta i kompra di e propiedatnan di pueblo di Kòrsou na Den Haag, i pa tene esnan responsabel pa tur reperkushon finansiero di e dil aki.

Tabatin un di tres moshon kaminda ta urgi gobièrnu pa denter di un tempu rasonabel, den lus di e resultado di investigashon di Kontrolaria General, buska konseho hurídiko a pone tur persona responsabel, pa kualke akto froudulento i/òf di malversashon. E moshon aki parlamentarionan Marilyn Moses i Jaime Cordoba no a aprobá, pasobra den e moshon tin nòmber di eks promé ministernan Sr. Ivar Asjes, Sr. Bernard Whiteman tambe minister plenipotensiario Marvelyne Wiels ku tabata metí den e benta i kompra di edifisionan en kuestion.

Na mes momentu tambe parlamento kompleto a bai di akuerdo ku un karta ku nan ta manda pa gobièrnu indikando ku ta para benta dje edifisionan. Pasobra e akta di kompra lo tabata en kontra di vários desishon pa ku “Landsverordening Domaniale Gronden”. Tambe parlamento mester tuma un desishon promé si ta bende e edifisionan i esei no a tuma lugá.

Vários di e parlamentarionan a mustra nan desaprobashon total pe forma kon e benta dje kas a bai. Tur tabata di akuerdo pa laga Kontrolaria General investigá henter e asuntu di benta dje tres kasnan i tambe kompra di un kas na Prinsegracht, Den Haag.

Bron: Extra

Ta na Parlamento si ta persiguí Marvelyne Wiels den benta di Kas di Kòrsou

Ta na Parlamento si ta persiguí Marvelyne Wiels den benta di Kas di Kòrsou | Extra

WILLEMSTAD.- Minister di Tráfiko, Transporte i Planifikashon Urbano, Sra. Zita Jesus-Leito a laga bon kla ku rapòrt di SOAB no ta unu pa aktua penalmente kontra di eks minister plenipotensiario sra. Marvelyne Wiels (Pueblo Soberano), pero mester wak si ta persiguí hende. Sinembargo e ta laga na Parlamento ku tin e outoridat pa kontrolá gobièrnu pa tuma e desishon si ta bai ministerio públiko ku e rapòrt riba e forma di benta di edifisionan di Kas di Kòrsou na Ulanda.

Minister Jesus-Leito a pidi reunion riba benta di e tres edifisionan di Kas di Kòrsou situá na Den Haag, dos kantor na Badhuisweg 173 i 175 i e residensia di e Minister Plenipotensiario na Wagenaarweg 3.

Na 2014 e Minister Plenipotensiario di e tempu ei, Marvelyne Wiels, a husga ku e edifisionan na Badhuisweg no por a fungi mas komo kantor ya ku nan estado di mantenshon tabata laga hopi di deseá i e opshon pa drecha nan no tabata unu faktibel. Na sèptèmber 2015 Sra. Wiels ku aprobashon di Gabinete Whiteman a sera un akuerdo pa bende tantu e dos kantornan, komo e residensia di e minister plenipotensiario. Despues di esaki sra. Wiels a kumpra edifisio na Prinsegracht 63-65, Den Haag.
Sra. Jesus-Leito a bisa ku promé ku a kumpra mester a bende e edifisionan na Badhuisweg. Esaki no a tuma lugá, pero a kumpra edifisio na Prinsengracht. E makelaar mes a bende i kumpra e edifisionan di Kas di Kòrsou.

Na momentu ku ke persiguí mester sa kiko a pasa, i Konseho di Minister a bisa ku mester wak kiko a pasa eksaktamente.

E rapòrt di SOAB ta trata prosedura i no ta un rapòrt penal. Diferente punto ku mester a kumpli kuné no a tuma lugá manera mester ta. Ora ke bende un edifisio pa mas ku 50 mil florin, promé ku bende mester bai Parlamento i esaki sra. Wiels a faya kuné. Tambe e no a tuma tres oferta pa por a yega na un makelaar. Otro punto ta ku e montantenan di benta i esun di kompra tin diferensia. Esaki ta kosnan ku ta mira den dokumentashon. No por kue un dokumentashon asina hiba Ministerio Públiko sin tin echonan palpabel. Sinembargo Parlamento por husga na su mes kiko tei hasi, di akuerdo ku Minister Jesus-Leito.

Minister Jesus-Leito a bisa ku ta tilda nan partido di ta den gobièrnu na momentu di benta dje edifisionan. Pero e ta indiká ku na momentu a bende edifisionan na sèptèmber 2015 tabatin gabinete Whiteman na sèptèmber 2015. PAR no tabata den gobièrnu.

E motibu ku Sra. Wiels a duna pa bende e edifisionan tabata debí ku nan ta den mal estado i ta kosta mas tantu sèn pa drecha nan. E proseso di benta dje kasnan no a kana bon konforme di lei.

“Na momentu ku gobièrnu tuma desishon ku no ta konforme di lei, difísilmente e gobièrnu ku sinta por bai kana no konforme lei manera a sosodé den pasado. Den maldat si nos no por sigui bai den kaso di kontinuidat di gobièrnu”, segun Sra. Jesus-Leito.

SOAB a aserká sra. Wiels pa duna mas koperashon na momentu a traha e rapòrt, pero sra. Wiels a bisa e ke pone kondishon pa kual e no a koperá.

Fondo pa kompra di edifisio na Prinsengracht no tabata presupuestá. E último invershon den edifisionan di Kas di Kòrsou tabata na 2013, kaminda a invertí 100 mil euro den e kas di minister plenipotensiario pa drecha.

Na 1999 tabatin mantenshon grandi di tur tres edifisio di Kas di Kòrsou.

Bron: Extra

Marvelyne Wiels a kana su kaminda pa ku benta edifisionan di Kas di Kòrsou

Marvelyne Wiels a kana su kaminda pa ku benta edifisionan di Kas di Kòrsou | Extra

WILLEMSTAD.- Eks minister plenipotensiario sra. Marvelyne Wiels (Pueblo Soberano) a kana su kaminda pa ku benta di e edifisionan di Kas di Kòrsou, ta loke ku parlamentario sr. Jaime Cordoba a duna di konosé ayera den Parlamento.

Ayera Parlamento a debatí pa mira si ta bende e edifisionan aki, despues ku sra. Wiels a drenta akuerdo di benta na 2015 dje edifisionan pa un suma mas abou di nan balor. Ademas el a yega na akuerdo di benta sin aprobashon di Parlamento loke ku mester sosodé segun lei.

Sr. Cordoba a indiká ku e minister plenipotensiario ta kai bou di e minister enkargá ku asuntunan general esta Promé Minister. Kua desishon ku sra. Wiels a tuma ta kai serka Promé Minister. Promé ku sra. Wiels a tuma un desishon, el a atendé ku Promé Minister di e tempu ei, minister di VVRP i esun di finansa. Tur a bisé p’e dal bai ku benta dje edifisionan. Den e kuadro aki sr. Cordoba a bisa ku e tin tur korespondensia ku e eks minister plenipotensiario konstantemente tabata atendé ku gobièrnu di Kòrsou pa e firma e benta. Sra. Wiels a haña un “raad beslissing” i despues un “besluit” pa sigui ku e benta.

Un dado momentu Sra. Wiels mes a fada pasobra no ke a tuma un desishon di e kompra pa kaba, segun sr. Cordoba.

E Promé Minister di e tempu ei mester a tuma e desishon ei.
Tabatin rapòrt di SOAB ku ta indiká ku nan no a haña nada ku Sra. Wiels lo a hasi algu kontra den e benta i kompra dje edifisionan.

“E kasnan a hasi 72 aña. Tur gobièrnu di turno a bai den e kasnan i nunka a keda mantené. E kasnan tabata den mal estado. Si e gobièrnu di e tempu ei a tuma desishon pa bende edifisionan, ta nan mester sa, pero Sra. Wiels a kana su kaminda”, ta loke ku sr. Cordoba a keda ripití den sala di Parlamento ayera.

Tambe e Parlamentario a bisa ku minister ulandes enkargá ku Reino sr. Plasterk a hinka su kurpa den e asuntu aki i e tambe ta den e bòmbòshi aki. Ademas e ta mira ku tin yen di gritamentu di froude, pero sin echonan pisa.

Bron: Extra

Een Reactie op “Extra | Eks minister plenipotensiario a laga Kas di Kòrsou den estado ku no por a habitá

  1. Segun Zita Jesus-Leito, a laga bon kla ku rapòrt di SOAB no ta unu pa aktua penalmente kontra di eks minister plenipotensiario sra. Marvelyne Wiels (Pueblo Soberano). E dos muhenan aki ta meskos ku dos p*ta bieeuw un ta dek otro. Mester ta castigu di dios Korsou ta pasa ku e dos porkerianan aki por ta minister.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *