WILLEMSTAD. – Ku entrega di un “Valetudinaire Enquete” na Korte di Promé Instansia, Elhage Arms ke logra saka e bèrdat den kompra di pistol Glock pa Kuerpo Polisial.
Elhage Arms ta di opinion ku tabatin tur akuerdo ku lo kumpra serka nan pistol marka Beretta model PX4 Storm”, pero kontra di tur konseho minister di Hustisia na 2013 ta skohe su mes kaminda i sin niun destaho públiko i transparensia ta kumpra pistol Glock serka Inteco Guns & Ammo B.V. E loke ku a hala atenshon ta e tipo di enkuesta ku Elhage Arms ta pidi, esta “Valetudinaire Enquete”, ku ta un tipo di enkuesta ku un grado di urgensia, ora ku ke tende un hende ku sea ta bai fayesé òf bandoná pais, ta pidi pa promé ku hues ordená un investigashon, tende sierto hendenan ku tin peliger ku despues no por tende nan mas.
E petishon entregá djárason 21 di desèmber, ta indiká ku durante di “Justitieel Vierlanden Overleg” (JVO) na 2011, tur minister di hustisia den Reino Ulandes a bai di akuerdo ku ta instituí un komishon pa investigá e tipo di arma di kandela ku Kuerpo nan Polisial den Reino lo usa.
Di e forma aki a instituí e komishon “Commissie Nieuw Vuurwapen” (CNV). Manera ya menshoná punto di salida ta ku mester yega na un konsenso entre paisnan Ulandes Karibense pa usa e mesun tipo di arma di kandela.
CNV a hasi su investigashon i nan a yega na e konklushon ku e mihó arma di kandela ta e pistol Beretta model PX4 Storm. 19 di yüni 2012 tabatin un JVO atrobe, kaminda ku tur minister a bai di akuerdo ku e konklushon di CNV i dia 20 di yüni 2012, minister di hustisia di Kòrsou a bisa ku e lo sigui konseho di e rapòrt huntu ku e otro ministernan.
Akinan negosiashonnan ku Elhage Arms a kuminsá i partidonan a yega hopi leu i gastunan a keda hasí pa kompra di e armanan serka Elhage Arms.
Na 2013 minister di hustisia sin niun previo aviso ta kumpra pistol Glock serka Inteco Guns & Ammo B.V., lagando Elhage Arms pegá ku su gastunan hasí.
Den e kuadro aki Elhage Arms ke tende vários hende den e enkuesta aki i prinsipalmente Minister di Hustisia pa saka na kla dikon el a hasi e kambio drástiko aki sin tabata transparente den su desishon.
Bron: Extra