WILLEMSTAD.- Elmer Wilsoe lo no aseptá un puesto komo Parlamentario. Te ainda e ta sospechoso den e kaso di asesinato di Helmin Wiels. Wilsoe ta laga e puesto pa e siguiente riba lista di Pueblo Soberano.

Segun Wilsoe e echo ku e ta sospechoso den e kaso “Maximus” ta motibu personal pa no aseptá e puesto. Den e kaso Ministerio Públiko ta investigá ken ta responsabel pa asesinato di Helmin Wiels.

Manera ta konosí Wilsoe ta number 4 riba lista di partido Pueblo Soberano. Durante elekshon di 5 di òktober e partido a haña 2 asiento. Number 1 ta Jaime Cordoba, number 2 ta Melvin “Mac” Cijntje, number 3 riba lista ta Ruthmilda Larmonie-Cecilia, Wilsoe ta number 4. Posishon di number 5 ta di Sherwin Leonora.

‘Ayera ami a bisa partido ku mi lo no aseptá un puesto komo parlamentario te na momentu ku mi no ta sospechoso mas den e kaso. Mi a konfirmá esaki.” Partido ta den proseso di formashon. Wilsoe ta di opinion ku mester ta kla pa tur hende, ku si e situashon lo presentá e lo no ta aseptá e puesto, pero duna e chèns na number 5. ‘Mi no ta bai sinta”, Wilsoe a splika.

Dia 6 di sèptèmber durante un rueda di prensa den sede di Pueblo Soberano Wilsoe a reakshoná riba lèkmentu di dokumentashon di tim di reshèrshi RST tokante investigashon di persona ku ta sospechá pa duna órden pa e asesinato di Helmin Wiels. Wilsoe ta menshoná komo sospechoso.

Segun Wilsoe e no tin nada di aber di e asesinato i no ta eksistí niun prueba kontra su persona. Durante rueda di prensa Wilsoe a splika ku e situashon ta sumamentu tristu, pero lo no afektá su persona. ‘Mi no tin miedu di niun hende. Ministerio Públiko no ta spanta mi. Fiskal Ger Rip (ku ta dirigí e investigashon, EXTRA) no ta intimidá mi. E no por kibra mi tampoko. Pasobra mi tin un karakter sumamente fuerte.”

Bron: Extra