WILLEMSTAD.- Elsa Rozendal (MAN) ketu bai ta miembro di Staten. “E por keda na e puesto kuantu ku e ke. Por ta un siman, un luna, un aña òf henter e periodo kompleto a ménos ku e bira minister”, asina presidente di Konseho Supremo Elektoral Raymond “Pacheco” Römer a bisa.

Tin hopi bista kiko e miembro di MAN ta bai hasi relashoná ku su posishon di minister i e persona ku lo siguié den Staten. Informashonnan ku ta sirkulando ta indiká ku sra. Rozendal pa awor aki lo disidí pa keda den Staten, sigur awor ku partido MAN a bandoná e entendimentu interno ku a sera ku esnan ku mas voto riba lista lo bai Staten.

Sra. Rozendal a haña 1397 voto den e elekshonnan di dia 5 di òktober último. Si e bira minister, e persona ku ta bin na remarke pa haña su asiento ta Amador Nita ku a haña 101 voto.

Römer a bisa ku djamars último, 5 miembro a aseptá e karta ku a manda pa nan ku nan ta elegí komo miembro segun e sekuensia di lista. Nan ta Henny Reinillia di PNP, Curtley Obispo i Stephen Walroud di PAR, Gassan Dannawi i Yaël Plet di Partido MAN. Ayera dos miembro di Pueblo Soberano a aseptá nan postulashon ku ta Melvin Cijntje i Sherwin Leonora. E miembro Elmer Wilsoe tabata number kuater riba lista di Pueblo Soberano i por lo tantu tabata na turno pa haña un puesto den parlamento pero el a gradisí pa e puesto komo ku ketu bai e ta sospechoso den e kaso Maximus, e investigashon ku ta buskando e outornan intelektual di asesinato di e dirigente polítiko Helmin Wiels. Wilsoe a disidí ku tanten ku no tin klaridat den e kaso aki, e lo no aseptá e funshon.

Na tur 7 miembro nobo a aseptá nan postulashon i nan lo hura otro siman despues ku Staten aseptá nan kredensialnan den un reunion ku lo tuma lugá djabièrnè 6 di yanüari awor. Presidente di Staten Humphrey Davelaar a konvoká e reunion riba petishon di oposishon. Por aprobá e kredensialnan na momentu ku e punto di agènda number 1 ku ta “Dokumentunan ku a drenta” subi mesa. Despues lo suspendé e reunion pa e miembronan hura na Palasio di Gobernador. Despues lo sigui e elekshon di un presidente i visepresidente nobo di Staten. Finalmente lo debatí riba e  akuerdo di gobernashon 2016-2020.

Pa loke ta trata e posishon di sra. Rozendal, Römer a bisa ku e miembro di Staten no a indiká ku e lo baha komo miembro. Por lo tantu su posishon ta keda sin kambio. No tin límite pa e hasi esei tampoko. Ta e mes lo mester tuma e desishon ei i na e momentu ku e hasi esei, Konseho Supremo Elektoral lo informá e miembro ku ta na turno, asina Römer a splika. No tabata masha kla kiko sra. Rozendal lo bai hasi den e kaso spesífiko aki. Si e no aseptá pa bira minister, MAN lo mester buska un otro kandidato pa e puesto.

Informashonnan ku EXTRA tin ta indiká ku probablemente MAN lo buska un kandidato pa minister di finansa. Kenneth Gijsbertha e ora ei lo skùif di e ministerio di finansa pa esun ku sra. Rozendal lo a haña ku ta e puesto di Enseñansa, Kultura, Siensia i Deporte.

EXTRA a konstatá ku den medionan en general i riba retnan soshal tin basta remarke riba e manera ku a atendé e situashon den gobièrnu, prinsipalmente e ròl ku partido MAN a hunga den e  totalidat. Prinsipalmente e splikashon un poko erátiko i kontradiktorio ku a duna djabièrnè pa ousensia di sra. Rozendal ketu bai ta tópiko di diskushon. MAN mes no a duna komentario riba e aspekto aki pero si riba e otro desaroyonan interno.

Bron: Extra