WILLEMSTAD,- Presidente di partido MAN, Emile Wallé, ayera atardi a splika ku te ainda no tin gobièrnu nobo. Segun Wallé proseso di informashon ta andando. Durante e dia di ayera tim di negoshadónan di partido MAN, PAR, PNP i Pueblo Soberano a reuní pa deliberá tokante repartishon di karteranan.
‘Nos no ta kla ainda. Pero nos ta serka kla’, asina Wallé a splika ayera atardi. Awe tim di negoshadónan lo sigui ku deliberashon. Wallé ta kere ku awe partidonan ta keda kla. Wallé ta splika ku awe lo sigui kombersashon den un esfera trankil. Segun e presidente di MAN ayera partidonan a papia pa e promé biaha tokante repartishon di karteranan.
‘E problema ta ku nos no tin pasenshi na Kòrsou. Nos tur no tin pasenshi, ni ami, ni abo, niun hende. Tur hende ta spera ku formashon ta kla ayera. Pero nos ta tuma nos tempu. No tin problema den formashon. Pasobra nos ta wak tur kos huntu. Nos a bisa ku nos ta kana huntu. Ayera nos a papia ku otro masha trankil tokante e pregunta: Kiko ta e método ku nos ta bai skohe pa repartí karteranan?
Anto tin diferente métodonan ku nos a papia di nan. Nos ta bai skohe un método i elaborá riba esaki.’
Segun Wallé: ‘Nos ta yegando na otro. E ta bayendo na un forma di trankilidat. E ta bayendo den un forma di respetá kada un ku su posishon. Pasobra bo tin ku bai sinta ku otro den hopi konfiansa, sigui traha huntu ku otro, pa e pueblo haña kiko pueblo ta pidiendo. Ta hopi bon pa relashon den kuminsamentu ta basá riba igualdat, rèspèt, konfiansa i trankilidat.’
Wallé: ‘Kere mi. E mesun hansha ku nos tur tin pa nos keda kla. Mi tambe tiné.’
Bron: Extra