Update met vonnis

WILLEMSTAD. – Pasombra nos tur tin derecho di sa unda esun su derecho ta kuminsá i esun di e otro ta kaba, sigur den un komunidat chikí manera esun di nos, FCW-legal lo siguí prosedé den e kaso ku el a entamá kontra di Lichtveld.

Hues den su veredikto di dia 5 di Aprel a diktá ku Lichtveld tabatin derecho di ekspreshon di opinion libremente sin tene kuenta ku e ta tacha e bon nòmber di FCW-legal ku su alegashonnan.

FCW-legal a entamá e kaso aki pa demandá Lichtveld rektifiká loke e ofisina ta konsiderá defamatorio pa e bon nòmber ku e ofisina ta gosa di dje den nos komunidat por lo ménos parsialmente por keda remediá. Hues sinembargo a husgá ku e derecho di opinion liber ta pisa mas ku e daño ku e opinion ekspresá dor di Lichtveld ta hasi na FCW-legal.

FCW-legal ta konsiderá ku e veredikto den e kaso aki ta gasolin riba kandela ya ku e ta krea mas konfushon rondó di e pregunta ki derechi un hende tin di ekspresá su mes públikamente riba otro, sin mester tene kuenta ku e ta tacha e otro persona su bon nòmber. FCW-legal no ta akuerdo ku esaki i ta apelá e kaso basá tantu riba interes propio komo na bienestar di nos komunidat. Na opinion di FCW-legal a pasa e frontera di loke nos ta konsiderá komo ofensivo.

Esaki ta bira mas pió ora ku tene na konsiderashon ku nos ta biba den un komunidat chikí. E peliger ta sinta den e echo ku e límite, di loke den nos komunidat nos ta balorá komo nos norma i balor, ta pinta di disparsé. Komunidat ta spera di nos korte tambe ku e ta stipulá límitenan di loke por konforme nos realidat sino esun ku ta ekspresá aparentemente ta liber pa e ekspresá su mes manera e ke, miéntras esun ku ta wòrdu tacha, ku ekspreshonnan defamatorio, no sa te unda e límite ta ku e mester soportá.

E tipo di márgen di libertat aki por funshoná den komunidatnan grandi ku miónes di hende, pero por tin reperkushon serio den un komunidat chikí manera esun di Kòrsou. Ta netamente e klaridat aki FCW-legal ke logra, sigur awor ku e ofisina mes a bira un víktima di e trapamentu di límite aki.

Bron: Extra

Naschrift KKC

2017 04 05 – VONNIS Camelia FCW Legal vs Lichtveld by Black Lion on Scribd