Informashonnan for di Trinidad & Tobago ta indiká ku e kompania doño di e barku tabatin un akuerdo pa transporte di pasahero entre e dos islanan ku ta forma parti di e pais. Gobièrnu di e pais a kanselá e akuerdo pa motibu di supuesto korupshon den e negosashonnan. “E barku no ta drenta aki”, asina gobièrnu di e pais a deklará ayera.
Minister di Trabou i Infrastruktura di Trinidad, Rohan Sinanan di su parti a bisa ayera ku su pais no sa nada di yegada di e barku na Trinidad. E minister anterior di Trabou i Infrastruktura di e pais a firma un akuerdo ku e fèri pero gobièrnu a kanselá e akuerdo. “Nos no sa nada di yegada di e barku na nos pais, asina e minister a reakshoná ayera relashoná ku informashonnan ku e fèri a sali for di Panamá i ta bayendo direkshon di Trinidad via di Kòrsou. Segun e minister, gobièrnu di su pais no ta rekonsiderando un akuerdo ku e kompania Bridgemans Services Group (ku base na Vancouver, Canada) relashoná ku e fèri aki.
Diferente medio a informá ayera ku e barku a sali for di Panamá i tabata riba ruta pa yega Kòrsou. Ayera ku sosten di toubotnan el a yega Kòrsou i aparentemente ku e intenshon pa bai drecha den Dòk. Na Trinidad mes algun medio a informá ku e barku a bin buska kombustibel aki pa sigui su ruta pa Port of Spain kaminda tin un diskushon grandi ta ward’é. Gobièrnu no kier tende nada di dje i e akuerdo ku a firma miéntras ku e doño ta nulo.
Na último ora EXTRA a tuma nota di deklarashonnan ku promé minister di e pais. dr. Keith Rowley a hasi den sentido ku un akuerdo ku a sera ku e kompania doño di e fèri no a bai den forma korekto. Den un konferensia di prensa, el a bisa ku ta trata di un “fiasco”. Segun e publikashon, e pais a sera un akuerdo tantu ku Ocean Flower 2 i un otro fèri Cabo Star. “Nos a tuma nota di informenan investigativo riba e dos fèrinan aki i a konkluí ku kosnan no a kana masha bon den e proseso aki. Gobièrnu enbèrdat a bai di akuerdo ku e kontraktnan pa e dos fèrinan aki, pero awor ta resultá ku no ta masha kla ta ken a hiba e negosiashonnan ku e grupo pa finalmente sera e dilnan. E detayenan no ta masha transparente. Loke si nos sa ta ku nos lo sigui buska un otro fèri pa e konekshon entre Trinidad i Tobago i no a fèrinan aki’, asina el a bisa. E promé minister a bisa ku a nombrá un investigador speshal pa buska kontestanan relashoná ku e kaso aki.
E mandatario a bisa tambe ku si e barku ta biniendo den direkshon di e pais, e lo no haña entrada. “E boto por nabegá libremente den kualke laman òf oséano pero aki nan e no ta bin komo ku tur kontrakt ta kanselá”, asina el a bisa. Konsiderando e desaroyonan aki, no ta masha kla kiko ta bai pasa ku e fèri awor aki. Ta posibel ku e doñonan, konsiderando e punto di bista di Trinidad a disidí ku enbèrdat lo ta bon pa no sigui ku e biahe i disidí pa hiba e fèri drecha pero ku tin un polémika riba e barku ta sigur. Outoridatnan di Trinidad ta sigurá ku aya e no por bai.
Bron: Extra