Extra | Fiskal ta bai dagfar apòstel Balentina pa otro akusashon

rechtbank-stadhuis-hof-vonnis

Fiskal ta bai dagfar apòstel Balentina pa otro akusashon

WILLEMSTAD,- E kaso di pastor Orlando ”Lando” Balentina (52) a bolbe keda presentá ayera den sala di korte. Esaki  pa motibu ku ainda e investigashonnan no ta kla.

Fiskal a laga tur hende asombrá ora ku e la bisa ku tin un denunsia mas ku a bin aserka di e 18 akusashonnan ku ya tin den kontra di apòstel.  Pa loke ta trata esaki a bin un disputa den sala ku mester dagfar Balentina pa e akusashon aki òf por pone huntu ku e otro nan.

Balentina ta keda akusá pa violashon seksual i tambe aktonan inmoral ku vários menor. Ayera tabata  di 3 biaha ku e kaso ta keda posponé. Hues a duna di konosé ku tur loke a keda pidi den e “regiezitting” di 14 di òktober aña pasa  a keda hasi dia 4 di novèmber pa hues komisario. Tabata 31 di yanüari último ku fiskal a manda un mail pa avisá di e akusashon nobo lo mester a bin for di Ulanda  kontra di e akusado.

Ta trata di un otro víktima ku no a yega 18 aña di kual e apòstel lo mester a kometé aktonan inmoral kuné. Segun fiskal abogado nan di e akusado mr. Blonk i tambe Harlequin ku a bin direktamente for di Ulanda, a pidi hues pa rechasá e akusashon aki. Hues a duna di konos’é ku tin un map di dokumento di Ulanda ku a keda yama “Rotterdam” di kual tin tur e akusashonnan di e víktimanan na Ulanda aden. E abogadonan a keda babuká pa motibu ku nan a bisa ku nunka nan no a haña e  map aki.

Segun fiskal e no tabata sa ku e abogadonan no a risibí e map aki, mirando ku na su pareser esaki tabata e kaso. Hues a bisa di ta bai di akuerdo ku fiskal i ta plania un otro fecha pa e di dos akusashon ku tin kontra di apòstel. Segun hues mas aleu promé ku 17 mei tur akusashon mester ta aden. Hues a bisa  ku for di e 22 personanan ku mester a keda skucha 11 so a wòrdu interogá. El a splika ku ainda falta 2 mas pa keda skucha mirando ku nan ta na Ulanda i tin ku hasi un petishon pa esaki tuma lugá.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *