WILLEMSTAD. – Korte ayera a trata e kaso di atrako armá ku violensia den bibienda na Castorweg. Esaki despues ku e kaso a keda pospon’é 3 biaha. Ta trata di un kaso kaminda 2 hòmber venezolano i 2 yu di Kòrsou ta keda akusá di tabata involukrá den un atrako brutal ku violensia.

E hòmbernan Ingomar Calvenhoven (26) , Wendell Dovale(21) di Kòrsou i tambe Cesar Villavicencio (25) i Yahn Lugo Vargas di Venezuela ta esnan sospechá den e kaso aki. Nan ta keda akusá ku dia 15 di yüni 2016 nan a drenta den bibienda menshoná di un famia i kometé e atrako.

Doño di e kas a deklará ku e ku su señora tabata den kas ora ku nan a tende un zonido duru patras. Direpente e porta a habri i 4 hòmber a kore drenta nan kas kara tapa. Dos di e hòmber nan a eksigí sèn den un bon spañó. E otro hòmber tambe tabata papia spañó pero ku aksènt di papiamentu. E víktima hòmber a logra kore drenta den kamber sera e porta. E malechornan a keda bati na e porta i bis’e si e no habri nan lo mata su kasa. Direpente e ta tende su kasa a grita.

Bisiña nan tambe a tende e gritu i a yama polis mesora. E hòmbernan a menasá miembronan di e famia ku arma di kandela i a bai ku vários hoya balioso, telefònnan selular, un pòtmòni ku 3 florin aden. Durante ku nan tabata kometé e atrako, polisnan a yega rápido na e sitio. E hòmbernan aki mesora a sali na kareda i a laga vários kos kai durante nan fuga. Polisnan a konfiská máskara, hanskun, arma di kandela i otro artefaktonan ku ta keda uza den atrako. Polis a logra gara Calvenhoven, Dovale i tambe Villavicencio. E dos yunan di Kòrsou a kore bai skonde tras di un muraya nèt den serkania di e bibienda.

E víktima a rekonosé e oloshi ku tabata benta banda di kaminda. Durante un entrada hudisial, polisnan a haña den kamber di hotèl kaminda e venezolanonan tabata keda 2 telefòn selular. Ayera e akusado Calvenhoven a bisa ku e dia ei e tabata hòrtando na un outo ora ku direpente el a mira polisnan kore yega. El a spanta i kore bai skonde. E no tabata sa nada di atrako. Dovale tambe a ninga e akusashon i a bisa ku e dia ei el a bai pa piska den área di Zeelandia. Direpente un outo straño a yega para den su banda i dos hòmber a baha ku arma di kandela.

Esaki a pone ku el a spanta i bai skonde bou di kònteiner. Na momento ku nan a bisa ta polis el a sali. Polisnan a konfiská algun paña i T shirt, maskarada ku e sospechosonan a benta afó durante nan fuga. Tambe nan a konfiská un mea pa kabei ku ta klòp ku DNA di Dovale. E akusado a bisa ayera ku esaki por ta posibel pa motibu ku hopi biaha e ta frekuentá e área ei i ku e mea ta kai kada bes for di su kabes. E ta pensa ku den un di e dianan ei e mea por a kai i nèt awó polis a hañ’e.

Fiskal a bisa ku e loke e akusadonan a deklará ta puru mentira. Segun fiskal tin sufisiente evidensia ku por pruebá ku ta nan a kometé e atrako. Fiskal ta haña e akusashon pruebá i ta demandá tur e akusadonan na 9 aña di kastigu. Aki 3 siman korte lo diktá sentensia.

Bron: Extra