WILLEMSTAD.- Finansiamentu di Fondo di Kriminalidat ta un gota riba un plachi kayente si ta bai pa garantisá seguridat riba Kòrsou. Asina e relato anual di 2016 di Fondo di Kriminalidat ta bisa den su konklushonnan.
E ta bisa ku, e aktividatnan i trabounan den 2016 ku tabata boga pe, Minister ta duna kontenido na e meta di e fondo i di un forma legal, adekuá, responsabel i balansá.
Ta trata aki di finansiamentu di proyektonan pa kombatimentu di kriminalidat. Pero finansiamentu di proyektonan for di e Fondo di Kriminalidat defakto por ser konsiderá komo un gota riba un plachi kayente, si ta trata di e grado di inseguridat riba Kòrsou, esei pa motibu ku e fondo aki prinsipalmente ta ser destiná pa proyektonan ku ta kai bou di Ministerio di Hustisia, i ta finansiá ménos proyektonan integral i ku ta bai mas aya ku e Ministerio.
T’asina ku na mei 2014 mediante un moshon Parlamento di Kòrsou a instruí Minister di Hustisia pa bini ku un maneho integral interministerial pa kombatimentu di kriminalidat, esei despues ku Minister a enfatisá ku kombatimentu di kriminalidat mester ser aserká di un forma integral pa e ta efektivo. Banda di represhon lo mester dediká atenshon na prevenshon i resosialisashon, i ku esaki mester ta na un nivel mas aya ku e Ministerio.
Tur esaki a redundá den lantamentu di un Plataforma Nashonal pa Desaroyo di Hubentut. Un biaha mas e relato ta bisa ku e finansiamentu ta un gota riba un plachi kayente. Prinsipalmente si mira e kantidat di proyektonan entrega ku tin un aserkamentu integral ku ta pidi pa ser finansiá for di Fondo di Kriminalidat.
PROYEKTONAN FINANSIA
Den e relato aki por haña un bista finansiero di e aktividatnan na nivel di proyekto. Por konkluí ku e total ku a ser finansiá na proyektonan den 2016 tabata di 2.488.915 (2.5 mion). E suma aki no ta nada di kompará ku e loke a keda entrega pa finansiá. Na proyektonan i petishonnan a suma 17.1 mion florin.
Un total di 8 proyekto a keda akordá promé ku 2016 i ser ehekutá den 2016. Ta trata aki di e proyektonan di Sta. Maria Pirates (195 mil). SIFMA (70 mil), Fundashon E Premio Perfekto: E wards (308 mil), Youth Vision 5000 (222 mil), Politur-2 (414 mil), Fundashon Instituto pa Formashon Musikal (100 mil) i FDDK (19 mil). Den esakinan mester bisa ku a komprometé pa 4.3 mion, pero den 2016 a paga 1.4 mion.
Bron: Extra
