WILLEMSTAD.- ‘For di promé yanüari 2017 Ontvanger ta bai kuminsá kobra interes riba kobransa (invorderingsrente). Awor ontvanger no ta kobra interes riba kobransa. No ta ku Ontvanger no tabata outorisá pa kobra.

Pero e porsentahe tabata hopi haltu, den e banda di 9 porshento. Awor e porsentahe ta keda revisá riba e nivel di 3 porshento i Ontvanger a disidí pa kuminsá kobra.” Asina Alfonso Trona di Servisio di Impuesto i Ontvanger a splika. ‘Mi ta apelá ku si tin personanan ku te ainda tin debe por akudí na Ontvanger. Te ku 31 di desèmber e aña aki niun interes ta keda kobrá. Te 31 di desèmber tin un periodo di toleransia”, segun Trona. ‘Pero for di promé di yanüari 2017 interes di kobransa ta wòrdu kobrá.”

Trona ta splika: ‘Ki ora un interes riba kobransa ta wòrdu kobrá? Ora término di paga riba un aanslag ta kaduká. Ora Ontvanger ta start su ‘tour’ di kobransa ku un aanmaning e ta manda pa bo Ontvanger por hasi un kalkulashon riba bo ku interes di kobransa.”

Minister di Finansa José Jardim a splika ku e interes a wòrdu fiá hopi aña pasá i ta keda na 9 porshento mas o ménos. ‘Loke nos a konstatá ta ku e tasa di interes no ta pas mas den e realidat monetario ku nos tin awendia.” Segun Jardim Ontvanger a hiba un maneho di toleransia. ‘E tabatin e obligashon pa kobra interes. Pero el a disidí pa legumai interes pasobra e tasa di interes tabata eksageradamente haltu. Den e kambio reforma ku a bin nos a redusí tasa di interes pa e nivel di 3 porshento. Ku ta un manera ku ta pas den realidat monetario.”

Segun Jardim Ontvanger no a hinka pagadó di impuesto den un situashon difísil ku e 9 porshento. ‘Pero Ontvanger tin ku stimulá pagadó pa paga su impuesto si.”

Bron: Extra