WILLEMSTAD.- Basta reakshon EXTRA a haña ayera riba nos publikashon di kandidatonan pa minister ku ainda no a pasa skrining. Entre otro EXTRA su fuentenan a indiká ku tin un konseho negativo riba e kandidato Kenneth Gijsbertha ku porsierto ta formadó tambe di e gobièrnu próksimo pero no ta e so, tin mas kandidato pa e gobièrnu nobo ku ta den tenshon di nan resultado final.
EXTRA a sigui buska mas informashon i ta importante pa bisa ku teniendo na kuenta e supuesto konsehonan ei, nos fuentenan ta indiká ku e proseso di skrining ta kanando ainda.
No solamente riba e kandidato Gijsbertha e investigashon ta profundo pero tambe riba kandidato di Pueblo Soberano.
Loke nos fuentenan a indiká ta ku tin un diferensia entre skrining pa formadó i skrining pa minister. Esun di formadó por keda kla di un dia pa otro miéntras esun pa minister ta investigá asta e kondishon di salú di e persona envolví i transakshonnan finansiero.
EXTRA a purba haña kontakto for di djadumingu anochi ku sr. Gijsbertha i tambe ku lider di Man pero sin resultado. Loke si nos a haña ayera ta un mensahe di sr. Gijsberth indikando na EXTRA ku nos lo tende di dje. Te ainda e no a konfirmá ni desmentí e informashon. Den otro korant EXTRA a tuma nota ku el a bisa ku el a pasa skrining komo formadó. E no kier a drenta den detaye di e skirning pa minister.
Echo ta ku e skrining pa e ministernan di e gabinete próksimo ta durando bastante largu. Ounke tin di e kandidatonan ku ya a keda informá ku nan proseso di skirning ta kla miéntras tin otronan ku no sa ainda kon nan ta para. EXTRA mester enfatisá ku e proseso di skrining ta un konseho ku ta duna riba tur e kandidatonan, pero meskos ku un moshon den parlamento, e ta keda un konseho i por siguié i por keda sin siguié tambe.
Echo ta ku e proseso di skrining tin un tenshon enorme riba e gobièrnu nobo ku tin di bai sinta ya ku tur ta tende hopi kos papia pero te ainda no tin nada bon kla.
Bron:Extra