WILLEMSTAD.- Ayera durante di oranan lat di mainta, funshonarionan di MEO huntu ku Kuerpo Polisial di Kòrsou a bai Trommelstokweg na Dominguito despues ku ya algun dia atras a risibí e informashon ku na un kas lo tin un panaderia klandestino.
I ku e panaderia aki ta yena un trùk tur mainta i bai bende riba kaya.
Na yegada di outoridatnan na e kas nan a haña nan ku sorpresa despues ku a bin haña e kas aki kompletamente kombertí den un panaderia. I den e mesun panaderia aki tin personanan ta biba tambe. Mesora e outoridatnan a pasa over pa kontrolá dokumentu di tur e empleadonan i tambe wak si e “Pandaderia” ta dispone di e papelnan nesesario pa por operá di un manera legal. Pero despues di kontrol a konstatá ku e “Panaderia” no ta dispone di ningun dokumento legal i tambe a haña 2 empleado na e sitio ku ta permanesé di un forma ilegal riba nos isla. Mesora outoridatnan polisial a detené e personanan aki i transportá nan pa departamento di barak pendiente nan deportashon.
Aparte di esaki tambe a deskubrí 6 bòm di gas grandi na e kas. Segun lei ta pèrmisibel pa tin solamente 2 bòm di gas na un kas. Mesora a tuma kontakto ku personal di Curoil pa a transportá esakinan. Pa loke ta trata suministro di awa na e kas, tampoko tabata legal. A konstatá ku e personanan na e kas e kibra e lòk di e pipa di awa ku tabata sera pa por usa e awa.
Funshonarionan di MEO a indiká ku e personanan na e kas mester a deshasí di tur loke ya tabata traha den e kas esta pan, pandushi, pastechi etc. i deshasí tambe di tur makinaria for di den e kas. MEO mes lo kontrolá e proseso aki tambe.
Bron: Extra