Extra | Gabinete Koeiman ta sigui den insertidumbre

Gabinete Koeiman ta sigui den insertidumbre

WILLEMSTAD.- Gabinete Koeiman ta sigui den insertidumbre riba dos punto kual ta ampliashon di gobièrnu ku partido Un Kòrsou Hustu di señora Omayra Leeflang i tambe e komishon di zonifikashon.

Ayera un biaha mas lider di partidonan ku ta forma koalishon esta MAN, PAR, PNP i Pueblo Soberano a sinta na mesa pa papia riba ampliashon di gobièrnu ku partido Hustu, i e asuntu di e komishon di zonifikashon. Partidonan no por a haña otro, i a kumbiní ku awe nan lo sigui reuní pa sali for di e impase ku a surgi.

Manera ta konosí for di 15 yanüari partido MAN a aserka partido Hustu di señora Omayra Leeflang pa por forma gobièrnu. Hasta a bisa sra. Leeflang ku su partido lo haña e kartera di enseñansa, pero sin deporte. Deporte ta keda bou di kartera di finansa serka minister Kenneth Gijsbertha.

For di e dia ei, partidonan di koalishon a keda deliberá riba inkorporashon di Un Kòrsou Hustu den gobièrnu. Dia 2 febrüari señora Leeflang a bai prensa indikando ku el a pidi konfirmashon di partidonan di Koalishon si nan ta di akuerdo p’e drenta den gobièrnu i tambe si e kartera di Enseñansa ta bai p’e. Sinembargo ainda partidonan di Koalishon no por firma e karta aki, apesar ku promé minister i lider di partido MAN, sr. Hensley Koeiman a bisa sra. Leeflang ku esaki lo no ta un problema i ku pronto e lo haña e karta firmá.

Sinembargo den e siman aki, lider di Pueblo Soberano, sr. Jaime Cordoba a bisa ku e tin un karta entregá for di 15 yanüari na lider di partido MAN sr. Koeiman, unda e ta pidi pa sra. Leeflang firma ku e no ta mishi ku Enseñansa Liber, mirando deklarashon ku Leeflang a hasi riba enseñansa liber. Enseñansa liber ta un logro di Pueblo Soberano (Helmin Wiels). Cordoba na medianan a bisa di no ta firma niun karta pa partido Hustu.

Banda di esaki tambe tin e asuntu di komishon di zonifikashon di parlamento, kaminda e úniko partido di koalishon Pueblo Soberano, ta partisipá den dje. Djárason último partidonan di koalishon MAN, PAR i PNP, a bisa di no ta forma parti dje komishon. Meskos ku independiente sra. Leeflang. Pasobra nan no ta mira dikon mester lanta e komishon di parlamento, miéntras ku señora minister Susy Camelia-Römer, ya ta traha riba zonifikashon. Esaki tambe a krea un otro situashon, kaminda ta papia di un problema di konfiansa den koalishon.

Ayera durante reunion, frakshon di pueblo Soberano no tabata presente. Manera indiká awe partidonan a keda di reuní pa wak si ta sali for di e situashonnan ku a surgi. Ounke ta papia di un asuntu di konfiansa, pero niun partido ta mira ku ta yega asina leu di un kaida di gobièrnu.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *