WILLEMSTAD.- Partido MFK ayera a entregá un karta na gobernador Lucille George-Wout.

Den e karta, ku ta firmá dor 9 parlamentario (tur 4 miembro di frakshon di MFK, tur 3 miembro di frakshon di Kòrsou di Nos Tur, parlamentario pa Movementu Progresivo Marilyn Moses i parlamentario independiente Eduard Braam) e parlamentarionan ta bisa ku e ministernan di gabinete Koeiman no tin e sosten nesesario di Parlamento di Kòrsou.

Kòrsou awor konosé 14 parlamentario. Esaki ta konsekuensia di e 7 parlamentarionan ku a keda huramentá komo minister dia 23 di desèmber. Di e 14 parlamentarionan 4 ta di koalishon.

Frakshon di MFK a manda presidente di Parlamento un karta dia 24 di desèmber 2016 pa un reunion públiko ku karakter di urgensia, esaki mirando ku gabinete Koeiman no tin un mayoria den Staten ta sostené. Te ainda presidente di Parlamento no a reakshoná. Den e karta na gobernador tin skibí ku e parlamentarionan a manda e karta na gobernador pasobra presidente di Parlamento no a reakshoná riba nan karta. Segun e nuebe parlamentarionan ministernan di gabinete-Koeiman mester entregá nan posishon. Tambe segun e nuebe parlamentarionan e ministernan nobo no por tuma niun akshon pasobra nan no ta outorisá pa aktua komo minister. Tur nan aktonan komo minister ta pa nan mes kuenta, segun e nuebe parlamentarionan.

Parlamentarionan ku a keda huramentá komo minister dia 23 di desèmber ta: Hensley Koeiman i Kenneth Gijsbertha (MAN), Zita Jesus-Leito i Eugene Rhuggenaath (PAR), Jaime Cordoba i Ruthmilda Larmonie-Cecilia (Pueblo Soberano) i Suzy Camelia-Römer (PNP). Te ainda niun parlamentario nobo a keda huramentá.

Bron: Extra