WILLEMSTAD.- Gerensia di Aqualectra lo presentá awe den Fòrti, preshoná pa gobièrnu/akshonista pa atendé e asuntu di rekonekshon di un grupo di algu mas ku 300 persona ku awor aki no tin awa.
EXTRA a informá kaba riba e desaroyonan aki djasabra, despues ku akshonista a instruí gerensia pa rekonektá awa i bin ku un sistema di Pagatinu pa awa.
Gerensia no ta ninga e opshon aki direktamente, pero ta haña ku si ta bai hasi algu den e sentido aki mester paga Aqualectra pa e produkto. Produkshon di awa ta kosta i mester paga pa e produkto. Ademas, segun e propio gobièrnu, mester yega na un sistema ku e hende no ta kai den e mesun situashon atrobe. Den pasado tabatin diferente kliente pa kua a buska un solushon, pero kada bes nan ta kai den e mesun patronchi. “Mi mes a atendé diferente kaso personalmente”, asina gerente general interino Darick Jonis a deklará resientemente.
E reunion di awe ta mustra di bai ta un konfrontashon entre gerensia, hunta di komisario i gobièrnu/akshonista.
“Tin espasio pa atendé e situashon kabes friu, pero kaminda responsabilidat di kada hende ta na promé lugá. No por bai sinta riba stul di otro”, asina un fuente ku ta na altura di e reunion a bisa. Un di e kosnan ku kier evitá a todo kosto ta ku lo por surgi un situashon kaminda ku ta krea un presedente. Ya kaba diferente kliente a indiká ku si ta asina kosnan ta bai, nan tambe lo keda sin paga. Esei ta un preokupashon grandi.
Banda di esei e kompania ta pará dilanti di invershonnan grandi i kualke kambio den su proyekshonnan pa futuro lo por pone e kompania den problema atrobe, manera a pasa na 2010 tempu ku a baha preis di koriente ku 5 sèn ku a pone ku ta te aña pasá numa e kompania a rekuperá di e sla aki.
Gerensia ta sintié fuerte di su punto di bista a base di e raport-Willems ku a konkluí ku gerensianan mester karga nan responsabilidat a base di e Kódigo di Good Coporate Government. Violashon di e Kódigo aki ta kore pa kuenta di gerensia ku ta esun responsabel pa kuida e baiben na e kompania.
Akshonista lo por yega na e konklushon ku ta pone gerensia un banda, pero un paso asina lo nifiká ku e kompania lo keda sin direkshon. Ademas ta hopi probabel ku e gerensia aktual lo akudí na korte, loke lo bolbe generá e mesun kaminda di krus despues ku a kore ku otro gerentenan den pasado.
E kompania aktualmente ta kai bou di minister Lourdes Alberto (Finansa) ku parlamentario Eduard Braam a nombra. Sra. Alberto ta un eks-kolaborador di e kompania di Braam ku tabata atendé asuntunan di mandamentu di pashèntnan di Aqualectra i otronan den eksterior. Braam a bisa ayera riba Facebook ku e lo no permití nada iregular pa loke ta trata e kartera ku su minister ta manehá. “Serka nos lo no tin korupshon”, asina e parlamentario a bisa.
Bron: Extra
OMG wat een stel payasos zeg.
mester check e meter di Braam, tantu esun di kabez komo esun di su kas.
preshon pa hasi kosnan illegal -pueblo en general no ke pa e sen di hinter pueblo ta wordu husa pa un grupito ken no ta pagando nan debenan-esaki ta politikeria di nos sen -Si tantu e Politikonan ke hasi esaki-laganan paga esei for di nan mes saku.