WILLEMSTAD,- Asuntu di Konseho Supremo Elektoral pa tur parlamentarionan mester entrega un relato finansiero, ta kompletamente los for di proseso di screening. Asina formador Kenneth Gijsbertha a splika. ‘E no ta mara na screening’.
Gijsbertha ta splika: ‘Mi ta un kandidato riba lista (Partido MAN, EXTRA) ku tambe mester a kumpli ku reglanan. Manera tur kandidatonan ku a bai elekshon riba e diferente listanan. Tur, sea nan a saka asiento si òf no, nan tin ku duna relato. Esei ta konta pa tur kandidato. Esaki ta los for di parti di screening.’
Tur polítiko ku tabata riba lista di e último elekshon mester informá Konseho Supremo Elektoral individualmente kuantu nan a gasta den e elekshon i for di unda nan a haña e sèn pa kampaña. Presidente di Konseho Supremo Elektoral, Raymond ‘Pacheco’ Römer a hasi un distinshon entre partidonan ku tin te pa mas tarda promé di febrüari otro aña pa entregá nan relato finansiero. Pa kandidatonan individual e situashon ta otro.
E mas ku 300 miembronan ku tabata riba lista tur a haña un karta pa indiká na e konseho kon nan a finansiá nan kampaña individual.
Bron: Extra