Extra | Gijsbertha: ‘Laga Banko Sentral tambe duna opinion riba Inselair’

..Parlamentario Kenneth Gijsbertha ta sugerí...

..Parlamentario Kenneth Gijsbertha ta sugerí…

WILLEMSTAD.- InselAir ta un kompania di invershonistanan lokal ku hustamente a bini na momentu ku nos a konosé bankarota di DCA na 2004. I ku kapital lokal a bini huntu i hasi esfuerso pa lanta InselAir.

Esei di akuerdo ku sr. Kenneth Gijsbertha di frakshon di MAN den Parlamento ayera mainta pa trata e tópiko di InselAir. Segun Gijsbertha, e kompania aki den su dies añanan a bira, despues di KLM, e di dos aerolínea ku mas tantu a pèrkurá pa pasahero i turista aki na Kòrsou. Pues mester rekonosé ku e kompania aki tin su balor, pues por wak kon di un manera òf otro lo por saka afó kiko lo ta e konsekuensia makro ekonómiko si dado momentu yega asina leu ku e tin di sera.

Frakshon di MAN ta spera ku esei lo no tuma lugá, i lo hasi lo máksimo pa esei no yega asina leu.

Segun Gijsbertha, tur kompania dado momentu lo por haña su mes den un situashon no deseá, ku falta di likides. Pero esei no nesesariamente ta nifiká ku e resultadonan operashonal di e empresa tambe ta negativo. InselAir lo por tin su problema di likides, pero tin di wak tambe den su dies añanan di eksistensia kiko el a nifiká. Atraves di e komishon di sabionan ku a ser lantá lo por hasi un análisis di e situashon ei. Por wak tambe e proyekshonnan i posibel plannan ku por tin pa futuro. Lo wak eventualmente kon realístiko esei ta, i a base di esakinan lo por haña un idea muchu mas mihó di e situashon ku e kompania ta pasando aden.

Tin hopi empresa ku ta sera, i kada un ta unu riba su mes pasobra tin hende ku ta pèrdè trabou. Pero den e kaso aki ta papia di un empresa ku tin alrededor di 600 mama i tata di famia ku ta traha, ademas di e konsekuensianan makro ekonómiko ku siere di un empresa manera InselAir lo tin pa henter pais.

I si gobièrnu a ser aserká den e kaso aki i ku a tuma un desishon pa instituí un komishon pa bai hasi un análisis òf evaluashon, pasobra gobièrnu tambe mester ta preokupá ku un posibel siere di InselAir for di e punto di bista makro ekonómiko. Pero segun Gijsbertha, e lo no por ta otro tampoko. Ta p’esei e ta kere ku lo ta bon tambe pa den kuadro di e evaluashon, aserká Banko Sentral, ya ku e último aki tambe lo por duna un opinion for di un punto di bista makro ekonómiko. Pero komo frakshon, MAN lo buska tur sorto di forma ku por tin pa por garantisá kontinuashon di InselAir.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *