WILLEMSTAD.- Gobièrnu a fia InselAir un suma di 33 mion florin, pa pago den 5 aña ku interes. E fiansa aki ta pa salbaguardiá eksistensia di InselAir, pero mas ku tur kos pa tin konektividat ku Kòrsou.
E fiansa ta mará na kondishonnan tambe.
Minister Eugene Rhuggenaath a splika ku banda dje fiansa mester a bini ku kondishonnan pa ku maneho di e fiansa den e kompania i tambe pa stabilisá e kompania. Si InselAir dal porta sera no tin niun otro kompania aéreo pa yena e bashí ku lo bai tin. Den kaso di DAE e tempu ei tabatin InselAir. P’esei e yudansa na e kompania ku segun investigashon tin tur derecho di eksistensia.
Señor Rhuggenaath a bisa tambe ku tur plaka ku bini for di Venezuela lo bai pa gobièrnu. Manera ta konosí Venezuela debe InselAir un suma di 100 mion dòler. Hustamente e suma aki a hinka e kompania den problema.
E fiansa ta hasi InselAir finansieramente i operashonalmente salú i fuerte bèk. Partidonan a firma un akuerdo riba djabièrnè 27 di yanüari 2017 kaminda Gobièrnu bou di sierto siguransa i kondishonnan ta otorgá un fiansa na InselAir.
Pa Gobièrnu ta di importansia ku e aksesibilidat i konektividat di Kòrsou ta keda garantisá, kaminda seguridat ta na promé lugá. Tambe ekonomia, generashon di divisa i empleo na Kòrsou ta dependé di un alto grado di konekshonnan aéreo konfiabel ku paisnan den besindario.
Basá riba e akuerdo aki Gobièrnu di Kòrsou a otorgá e fiansa di 33 mion florin, ku lo keda pagá konforme e ehekushon di un plan di stabilidat.
Komo seguransa riba e fiansa, Gobièrnu ta optené entre otro e derechi riba propiedat (na ulandes ‘pandrecht’) i usufrukto (derechi di hasi uso i sakando e benefisionan, na ulandes ‘vruchtgebruik’) di 51% di akshonnan den e kompanianan ku ta forma parti di InselAir. Ku esaki Gobièrnu ta optené tur e derechinan di un akshonista regular sin bira doño di e kompania.
Gobièrnu i e akshonistanan aktual di InselAir kada unu a nombra dos komisario den e hunta di komisario di InselAir. E di sinku komisario, ku alabes ta okupá e puesto di Presidente Komisario, ta keda nombrá konhuntamente.
Minister Rhuggenaath a anunsiá ku e funshon di Presidente Komisario lo keda okupá dor di sr. dr. José Jardim, ekonomista i èks Minister di Finansa di Kòrsou. Su ekspertisio finansiero i eksperensia gubernamental lo duna un gran aporte pa e restrukturashon di e kompania.
Banda di esaki e partidonan a palabrá ku e tim di maneho lo keda fortifiká ku dos direktor statutario, konforme proposishon di Gobièrnu. Esakinan ta e presidente ehekutivo i e Chief Financial Offcier (CFO). E presidente ehekutivo ta guia e tim di maneho i ta representá InselAir.
Sr. Gilles Filiatreault a keda apuntá komo presidente ehekutivo. Sr. Filiatreault tin eksperensia internashonal amplio den e industria di aviashon. Sr. Filiatreault tin eksperensia práktiko den su pais di orígen, Canada i tambe na Merka, Sentral i Sur Amérika, region di Karibe, Oropa Oriental i Wèst Afrika. Sr. Filiatreault a spesialisá den inisio i restrukturashon di kompanianan di aviashon, tantu pa loke ta trata transporte di pasahero i karga.
Bron: Extra