WILLEMSTAD.- Gobièrnu di MFK- Kòrsou di Nos Tur-Pueblo Soberano-Movementu Progresivo-Braam-Dannawi lo tuma desishon pa kita e receptregeling, ku ta nifiká ku mester paga 1 florin pa kada remedi.

Minister-Presidente aspirá Gilmar ‘Pik’ Pisas a splika ayera: ‘Komo gobièrnu nos lo kita e florin. Nos lo tuma e desishon pasobra nos sa, ku e no ta funshoná. Huntu ku esei nos lo bin ku plan kon nos lo tapa e buraku finansiero. Pa e ta bira un desishon ‘budget neutral’.’ Segun Pisas no mester tin maneho mara na esei. ‘Pasobra e desishon lo wòrdu hasi pa pueblo. Awor nos lo tuma desishon. Dependé resultado di elekshon, nos por amplia e desishon.’

Segun Pisas: ‘Tin hopi desishon simpel ku gobièrnu por hasi. Por ehèmpel kontra kriminalidat. Nos lo bin ku maneho riba término kòrtiku ku lo duna fruta, ku lokual pueblo por ta satisfecho kuné. Nos ta riba e ruta ei.’

Pisas, banda di bira Minister-Presidente, tambe lo fungi komo Minister di Hustisia. ‘Komo Minister di Hustisia bo ta haña tur lokual e otro ministerionan ta faya kuné; bo tin ku dil ku esaki. Awor tin problema ku kriminalidat, ku prisòn, ku Voogdijraad, ets. Tin problema na tur kaminda. Intenshon ta ku nos lo tuma desishon riba término kòrtiku.’

Sr. Pisas a splika ku djasabra pasá el a sinta ku grupo di hende pa deliberá tokante problemanan i posibel solushonnan. ‘Nos mester trese trankilidat bek den komunidat. Te ainda nos ta mira ku a tarda hopi pa tuma desishon. Pa duna un ehèmpel: Wardakosta ta pidi hopi aña pa nan arma di kandela. Nan no a hañ’é te ainda.’

Sr. Pisas ta menshoná e tiroteo ku a tuma lugá djasabra pasá na unda 4 persona a fayesé. ‘Si mas hende ta karga arma di kandela e por yuda pa kombatí kriminalidat. Bo mester tin mas outoridat ku ta kompetente ku arma. Nan por aktua ora nan ta mira un akto di kriminalidat. Komo Minister di Hustisia mi lo tuma desishon pa duna hendenan di Wardakosta arma di kandela mas lihé posibel. Nos lo tuma desishon i no keda warda manera otronan semper a hasi.’

Bron: Extra