WILLEMSTAD. – Informashonnan ku EXTRA a haña ta mustra riba e echo ku gruponan ku ta interesá pa kumpra Campo Alegre ta interesá prinsipalmente den e parti di kasino.

Prostitushon riba su mes no ta dje lukrativo ei mas ounke Campo Alegre tin su historial. Gruponan ta mas interesá den e parti di kasino ku ta esun ku por krea hopi dividendo. Ya kaba tin diferente grupo a mustra interes i a pidi informashon, inkluyendo un grupo chines. Ministerio Públiko ku ta preparando pa e findishi sinembargo no kier bende “onderhands” ni maske kon bon e oferta ta. Lo tene un findishi públiko den kua gruponan internashonal tambe por partisipá. Komo establesimentu ku tin mas ku 50 kamber, Campo Alegre tin un lisensia di kasino. Leinan di Kòrsou ta bisa ku pa un “hotèl” haña un lisensia di kasino, e mester tin mas ku 50 kamber.

E establesimentu komo sentro di prostitushon mes a bin ta haña hopi kompetensia di sektornan eksterno manera Veeris i últimamente den e área di Santa Maria. Tin prostitushon ilegal ta tumando lugá i no por hasi nada kontra dje. Eks-minister Nelson Navarro a bisa ku el a haña diferente denunsia den e direkshon aki pero no por a hasi nada pasobra bo no por prohibí un turista, mayoria biaha venezolano i kolombiano, sinta na mesa dal un un beter ku un kabayero. Lei no ta prohibí esei, asina el a bisa.

Manera EXTRA a informá, Campo Alegre ta kla pa bai findishi. Lo saka anunsionan tambe den medionan internashonal den e próksimo simannan. E intenshon tabata pa e benta a tuma lugá fin di 2016. Un bosero di Ministerio Públiko a bisa ku mester pone un fin na e kapítulo aki ku yama Campo Alegre ku den último añanan konstantemente tabata den korte pa atendé diferente aspekto.

Tabatin hasta gruponan ta pretendé ku ta nan ta doño i gruponan ku ta doño entre nan mes a bringa pa e propiedat. Esei ta pone ku tabatin hopi beslag riba e establesimentu i ku e beslagnan aki no por pasa pa benta. Tin un but tambe ta kologá for di 2008 riba e lugá i no ta pagando. Ultimo rekurso a keda ta pa bende e empresa. Awor aki tur kos ta tras di lomba i ta antisipá ku den e promé tres lunanan di e aña aki, e findishi lo tuma lugá. E suma ku generá ku e benta lo bai pa e Fondo di Kriminalidat. “Ministerio Públiko kier saka mas tantu sèn posibel for di e benta aki”, asina e bosero a bisa.

Ekspertonan ku EXTRA a papia kuné a indiká ku e benta lo por generá entre 15 pa 20 mion florin. E lugá ta aislá, bon kuidá i tin un tereno basta grandi. Banda di esei e lisensia di e kasino tambe ta pisa den e preis di benta. Campo Alegre ta establesé na Kòrsou for di 1949, e tempu aya komo distraishon pa biahero i nabegantenan.

Den kurso di dékadanan su énfasis a kambia i awor aki ta un distraishon lokal tambe. Awendia hasta hende muhé por bishitá e lugá. E doñonan nobo di e establesimentu por disidí loke nan ke ku e lugá. No nesesariamente e lo tin ku keda komo un burdel. Pa loke ta trata e posibilidat ku krímen organisá por penetrá den e lugá, no por evitá esei kompletamente. Pero lo wak si for di unda e plaka di kompra lo bin. Tabatin informe den sentido ku ta plumando e lugá pero no tabatin konfirmashon independiente di esei.

Bron: Extra