WILLEMSTAD.- N’e momentunan aki e status di e instalashonnan di Refineria Isla ta di tal forma ku tin un ouditoria tékniko ta tumando lugá, pa motibu ku den e akuerdo di hür aktual ku Pdvsa tin indiká ku mester midi kondishon di e plantanan pa si akaso resultá ku nan no a ser bon mantené i operá, lo por hasi un ‘claim’ na final di e akuerdo di hür.
Esei di akuerdo ku sr. Werner Wiels, presidente di e Tim Multidisiplinario riba Refineria Isla, a duna di konosé durante un presentashon den Parlamento ayera mainta.
Manera ta konosí, e akuerdo di hür ku Pdvsa ta terminá na aña 2019 i tin un ouditoria tumando lugá aktualmente, i ta premirá ku e ouditoria ei lo terminá na yüli 2017.
Segun sr. Wiels, n’e momentunan aki ta trahando riba reglanan mas estrikto tambe pa loke ta medioambiente, i esaki a basa riba kimamentu di gas natural komo e kombustibel nobo. Pero esei ta algu ku huntu ku ekspertonan lokal ta trahando ariba. E meta ta pa meimei di otro luna e promé konsepto ta kla.
Mas aleu sr. Wiels a splika ku na luna di sèptèmber 2016 a firma un MOU ku Guangdong Zhenrong Energy (GZE). E MOU aki ta duna sierto klaridat pa despues di desèmber 2019 na momentu ku e hür aktual ekspirá. For di e MOU aki ta e intenshon pa negoshá i yega na un akuerdo, i esei ta algu ku tambe ta tumando lugá n’e momentunan aki.
Kon a yega na Guangdong?
Segun Wiels, na yanüari último a presentá na gobièrnu e lista di mas ku 30 kompania ku tabata interesá na finansiá i asta operá e refineria. I entre nan tabatin solamente un kompania ku no a pidi garantia, ni di gobièrnu di Kòrsou ni di gobièrnu ulandes. Tur e otronan si a pidi. Esaki tabata den kuadro di búskeda di un partner stratégiko. Despues ku e intentonan pa yega na un akuerdo pa prolongashon di e akuerdo di hür a frakasá, a yega na un MOU ku Guangdong. Ta un kompania estatal di China.
Pa e terminal di gas natural tabatin inskripshon di 105 invershonista. I a keda 67 invershonista ku ta partisipando den e trayekto di destaho públiko pa yega na un terminal di gas.
E intenshon di e MOU ta pa e grupo bai na operá i mantené i modernisá e refineria; tambe integrá operashon di e planta di energia ( CRU) den operashon di e refineria; operá, mantené i upgrade i mehora e planta di energia; operá, mantené i upgrade e terminal di krudo na Bullenbaai; i mehorá e infrastruktura entre Refineria, CRU i Bullenbaai.
Bron: Extra