WILLEMSTAD.- Poko poko pero sigur e relashonnan ku e grupo Chines, Guangdong Zhenrong Energy ta hañando mas forma. Representantenan di e grupo aki ta na Kòrsou e dianan aki, i prueba di esei ta ku nan a probechá dje okashon pa duna un presentashon na Minister Presidente i Minister di Finansa, respektivamente srs. Hensley Koeiman i Kenneth Gijsbertha.

For di momentu ku e grupo a drenta aya na Fòrti tin informashonnan a kuminsá Sali, i finalmente den kareda di 8’or henter e delegashon a bandoná Fòrti.

Den deklarashon pa prensa lokal Promé Minister Koeiman a splika ku a trata aki di nada mas ku un presentashon di parti di e grupo Chines. Por bisa ku el a keda impreshoná ku e intenshonnan ku tin di parti dje konsorsio. Si e proyekto aki bai dor e lo por krea basta kupo di trabou pa nos hendenan, miéntras ku lo tin oportunidat pa nos hendenan sigui formashon. Un presentashon manera esaki tabata algu di spera, sigur si tene na kuenta ku despues di elekshon partido MAN a hasi un apelashon serio riba e gabinete anterior pa pone e plannan pa ku Refineria Isla ‘on hold’ pe siguiente gobièrnu por atendé un ke otro.

Di su parti, Minister di Finansa sr. Gijsbertha a deklará ku e tambe a keda impreshoná ku e loke e grupo aki lo tin di ofresé. Guangdong Zhenrong Energy ta e nòmber dje kompania, pero esaki ta konsistí di diferente otro entidat ku ta spesialisá riba sierto tereno. Asina tin kompania ku ta spesialisá den aktividatnan petrokimiko i otro ku ta spesialisá riba tereno marítimo. Tambe nan a mustra ku nan tin vasto eksperensia den aktividatnan i trabounan di reparashon di barku. Esei ta nifiká ku na Kòrsou nan lo por tin un balor agregá pa nos DOK.

Segun sr. Gijsbertha, e presentashon aki tabata sigur di importansia p’e pa motibu ku e ta e mandatario ku un kartera bou di kua un parti dje kadena energétiko ta resorta.

Manera ta konosí, algun luna pasá Guangdong Zhenrong i Gobièrnu di Kòrsou via di e tim multidisiplinario a firma un MOU i despues tambe un HOA komo resultado di e negosiashonnan ku a ser hibá den kuadro di remodelashon di Refineria Isla. Ta konosí ku e kontrakt ku gobièrnu di Kòrsou tin ku PDVSA ta vense na fin di 2018, i komo tal mester tin klaridat i mester a buska un otro partner pa invertí den e instalashonnan. E konsorsio Chines a anunsiá di lo invertí komo $10 bion den nos ekonomia.

Bron: Extra