WILLEMSTAD.- ‘E kriminalidat na Kòrsou ta duna mi doló di barika. Kada bia ora nos tin un likidashon na Kòrsou e ta duna mi doló.’ Esaki prokuradó-general di Kòrsou, Sint Maarten, Boneiru, Saba i Sint Eustatius Guus Schram ta splika.
‘Pa kolmo nos por mira ku likidashonnan ta bira mas violento kada bia. Ora nos ta kere ku ‘esaki ta e punto mas abou ku nos por yega’, nos ta keda konfrontá ku algu mas kruel. Esaki ta duna mi un doló di barika enorme. Mi ta sinti ku den nos komunidat tambe tin hopi hende ku tin doló for di e kriminalidat. Pero despues di dos òf tres dia ta parse ku e ta kita. Den media di komunikashon tin atenshon pa un likidashon, pero despues di dos òf tres dia tin algu otro ku ta den notisia.
Na mi opinion nos no mester pèrdè e atenshon. Nos no mester pèrdè e doló di barika, pero keda preokupá ku e kriminalidat enorme.’ Segun Schram komunidat mester traha huntu ku Ministerio Públiko i polis pa kombatí kriminalidat. ‘Ta parse ku komo komunidat nos ta lubidá hopi lihé e impakto di kasonan sumamente kruel.’ Schram, ku ta tuma despedida despues di 3 aña i mei komo prokuradó-general, ta splika ku komunidat no mester pèrdè e focus. ‘Pasobra nos no tin solushon den un periodo di dos òf tres dia tampoko.’ Segun Schram impakto di kriminalidat ta asina grandi den nos komunidat. ‘Si nos ke kombatí kriminalidat, nos tin ku mantené alerta.’
Schram ta tuma despedida komo hefe di Ministerio Públiko fin di luna. Su remplasante ta Roger Bos, ku ta kuminsá dia promé di sèptèmber 2017 komo prokuradó-general di Kòrsou, Sint Maarten i islanan BES. Manera EXTRA a skirbi resientemente e preferensia pa un PG nobo ta pa un ulandes karibense na promé lugá, pero den pasado a resultá difísil pa haña hendenan pa okupá e puesto aki riba e islanan di e 5 islanan ku e PG lo bai traha p’e.
Roger Bos ta desde 2012 fiskal mayó di parkèt na provinsia Limburg na Ulanda i desde 1999 tabata laborá den diferente funshon di guia empleá na Ministerio Públiko di Ulanda.
Bron: Extra
‘E kriminalidat na Kòrsou ta di mas’
WILLEMSTAD,- ‘Ministerio Públiko (OM) tin hopi trabou pa hasi. Pa motibu ku tin hopi kriminalidat na Kòrsou. E kriminalidat ta di mas. Esaki ta nifiká ku polis mester traha duru i komo konsekuensia tin hopi trabou pa nos tambe. Pero si nos, komo komunidat, ke kombatí kriminalidat nos mester traha huntu. Ta un trabou di nos tur. Pasobra si nos no ta traha huntu, pero laga tur kos den man di OM i polis so, nos no por duna un kontesta serio kontra e kriminalidat na Kòrsou, ku realmente ta hopi grandi.’
Asina prokuradó-general (PG) di Kòrsou, Sint Maarten, Boneiru, Saba i Sint Eustatius (islanan BES) Guus Schram a bisa durante un entrevista di despedida ku EXTRA. Roger Bos ta kuminsá dia promé di sèptèmber 2017 komo prokuradó-general di Kòrsou, Sint Maarten i islanan BES.
Na yanüari 2014, mr. Schram a asumí e puesto di Prokurador General, despues ku mr. Dick Piar a baha komo prokurador general.
Ora e ta wak bèk riba e periodo Schram ta splika ku e ta orguyo riba tur e trabou ku a keda hasi dor di Ministerio Públiko.
‘Den e último tres aña bou di mi guia Ministerio Públiko a hasi hopi trabou. Pero na mesun momentu mi ta realisá ku te ainda tin hopi trabou pa hasi.’ Schram ta konsiderá e proyekto ‘TOP C/Tur Wowo Riba Bo’ komo un bon ehèmpel di un proyekto pa kombatí kriminalidat na un manera integral. Meta di proyekto ta pa redusí e kasonan di ‘high-impact crime’ di un forma signifikante dor di atendé hóbennan di un forma personal i integral. Ta atendé ku nan ora nan ta sospechoso òf kondená pa kasonan na unda nan a kousa daño na nan víktima.
Den e atendimiento integral ta duna guia tambe na nan rumannan menor di edat i dado kaso ku nan tin yu. Schram: ‘Pa mi e ta un ehèmpel perfekto kon nos por kombatí kriminalidat. Pasobra promé ku un persona kometé un delito serio, nos por intervení. Na mesun momentu OM ta traha huntu ku hopi instansia. Den e koperashon mi ta mira e instrumento perfekto pa kombatí kriminalidat bou di hóben.’
Bron: Extra
Schram: ‘Nos ta biba den un estado di derechi. Nos no por investigá kasnan sin mas’
WILLEMSTAD.- ‘Mi ta komprendé ku tin hende den nos komunidat ku ke mira hustisia tuma medidanan mas drástiko kontra gangnan violente. Pero nos ta biba den un estado di derechi. No por ta asina ku nos lo drenta den tur kas den un sierto bario sin aprobashon di wes.’ Asina prokuradó-general saliente Guus Schram a splika den reakshon riba e rivalidat hopi violente entre gangnan na Kòrsou. ‘Mi ta komprendé ku for di komunidat tin hende ku ta bisa pa nos mester limpia sierto barionan; ku ta nifiká hasi investigashon den kasnan riba eskala grandi pa buska armanan. Pero nos ta biba den un estado di derechi. Si bo ta un siudadano ku no ta hasi nada kontra lei, polis i hustisia no tin niun derechi pa investigá bo kas sin pèrmit di wes.’
Schram: ‘Na otro banda mi ta komprendé hopi bon ku hende ta fada di e kriminalidat violente. Nan ta pidi pa medidanan mas drástiko. Pero nos tin reglanan ku nos tin ku atendé.’
Un problema grandi na Kòrsou ta e kantidat grandi di arma ilegal. ‘Nos maneho ta pa kita armanan ilegal for di hendenan. Pero finalmente nos mester yega na un situashon na unda hende no ta usa armanan ilegal mas i nan no ke armanan mas tampoko. Esaki ta un ruta mas largu. Un ruta ku no ta fásil. Esaki tin di aber ku enseñansa, desaroyonan sosial i por ehèmpel akohida despues di orario di skol. Tambe nos mester kambia e situashon ku awor ta eksistente ku bo por mira un glorifikashon di violashon den nos komunidat. Esaki mester stòp.’
Segun Schram e ruta pa yega na un komunidat ku muchu ménos kriminalidat por ta un ruta hopi difísil. ‘Pero esaki no ta nifiká ku nos no mester traha riba dje. Pasobra ta mi opinion ku esaki ta e opshon ku ta mas benefisioso pa nos pais.’
Bron: Extra