WILLEMSTAD.- Ki ora ku ta papia òf diskutí riba asuntunan ku ta regardá Refineria Isla, segun parlamentario sr. Kenneth Gijsbertha e tin di duna rekonosementu na esun ku a tuma e desishon hopi aña pasá pa Shell por a establesé su mes aki na Kòrsou.
Esei tabata un desishon tumá a base di un vishon. For di 1914 a tuma nota di tur e reservanan ku tabatin na Venezuela, i mirando Kòrsou su posishon geográfiko, areglonan fiskal i un haf natural adekuá a pone ku desishon a kai riba Kòrsou.
Nos tabata e lugá adekuá pa Shell a bin establesé, anto for di e tempu ei a instalá un refineria ku e kapasidat pa refiná krudo Venezolano, ku ta un krudo pisá.
Segun Gijsbertha, ta p’esei ora ku di parti di Shell e desishon a ser tumá ku nan lo a bandoná Kòrsou i ku PDVSA (Venezuela) a tuma e operashonnan over, e ta kere ku nos mester keda agradesido. Tempu ku PDVSA a bini refineria no tabata gana plaka, pasobra Shell a bai hustamente pa motibu ku e refineria no tabata deha mas. E no tabata duna e rendimentu nesesario, i despues di dos aña di pèrdida e desishon a kai pa sera.
Di parti di gobièrnu di Kòrsou a aserká Venezuela i komo bisiña i ruman nan a duna nos un man. Por sierto, geopolitikamente pa semper Kòrsou lo keda bisiña di Venezuela sin importá kua gobièrnu ta na mando den e pais aki. Naturalmente e ta di akuerdo ku nos mester ta semper riba pia, nunka na rudia, pero semper nos mester ta agradesido tambe. Den kuadro di esei segun Gijsbertha e lo keda semper agradesido na e operashon i refinashon di petroli aki na Kòrsou. E tabatin e privilegio di por a laborá pa e kompania aki durante 43 aña, di kual 12 pa Shell i 31 pa PDVSA. Gran parti di loke el a logra den bida i ku awe hopi hende ta hasi kudishi ariba, el a logra ku trabou honesto pa Shell i PDVSA. El a pasa den e diferente nivelnan i alkansá e tòp di maneho na Isla.
Segun Gijsbertha aktualmente e ta gosando di su entrada den forma di penshun di Shell komo esun di PDVSA, i hamas i nunka e lo por papia algu malu di e empresanan ku el a laborá pe. Naturalmente e lo tin di tene kuenta ku interes general di e pais aki.
Si nos ta rekordá 100 aña di refinashon aki na Kòrsou, mester tene kuenta tambe ku e parti di desaroyo sosio ekonómiko ku a tuma lugá shen aña pasá ku yegada di Shell. E aktividatnan di refinashon a un dje pilanan di mas importante den desaroyo i aktividatnan ekonómiko di Kòrsou. I frakshon di MAN lo hasi tur loke a na su alkanse pa kontinuá ku refinashon di petroli aki na Kòrsou, ku un medioambiente limpi i teniendo kuenta ku salú di hende, prinsipalmente esnan ku ta biba rondó di e refineria.
Bron: Extra
De zot. Zelfs over mij valt wel wat kwaads te vertellen.