WILLEMSTAD.- Pa motibu di salú i situashon finansiero e akusado Servania a keda kondená pa un transportashon di 22520 gram di koka den maleta pa Repúblika Dominikana.

Ministerio Públiko ta akusá Peter Servania nase na Haiti, di a trata na eksportá e kantidat di droga ariba menshoná dia 17 di mart último.

El a yega Hato i a chek in un maleta blou riba su nòmber e dia ei. Despues ku e kachó di duana a reakshoná riba su maleta, e personal a habri esaki pa hasi un kòntròl mas severo.

Aki nan a dal den 20 pakete pretu ku a resultá di tabata kokaina. E akusado ku ta enkarselá na e momentonan aki, tabata presente den sala pa responsabilisá su mes pa su akto.

Despues ku fiskal Koert a kaba di hasi e akusashon, e akusado a duna di konosé ku e no tabata sa kiko tin den e maleta.

El a splika ku bèrdat e ta esun ku a chek in e maleta. El a konta ku e no konosé e hende ku a pidié pa hasi esaki. Segun Servania el a topa ku e hòmber deskonosí pe band’i kas, di kual el a ofresé e trabou pa 4500 dòler.

E akusado a sigui bisa ku mirando su situashon finansiero i kòrdando riba su yunan, el a disidí pa hasi esaki. E mes ta esun ku a bai kumpra su pasashi despues di a risibí e plaka serka e doño di e droga.

Servania a bisa ku e no ke duna informashon di e hòmber pa evitá peliger pa su bida.
El a konta ku tabata den e dianan ku su mayornan mester a muda. E tabatin mester di sèn, pa motibu ku e tabata traha na un supermerkado pero a wòrdu kita pa motibu ku e tin stal hinka den su pia nan i no por para hopi.

Segun e akusado e tabata un hungadó di bala den e ekipo di Vesta hopi ten. El a hasi esaki pa bienestar di su yunan.

Fiskal Koert a duna di konosé ku Servania a keda kondená na aña 2013 pa lei di opio na Ulanda. El a keda gara ku bolita den su stoma i a risibí 5 luna.
Segun fiskal Servania mester tabata mas kouteloso i no por tuma maleta serka deskonosí sin kontrolá esaki. Tambe fiskal a duna di konos’é ku kada dos siman korantnan ta yen di informashon tokante mulanan.

Mirando e kantidat di droga ku e akusado tabatin den e maleta ku tabata riba su nòmber, fiskal ta hasi un demanda di 48 luna kompletamente inkondishonal.
Abogado di Servania mr Sambo ku ayera a hasi su debut den korte, a bisa den su defensa entre otro ku su kliente no tabata sa kiko tabatin den e maleta.

E abogado a splika ku Servania tabata un mucha ku semper a wòrdu tenta na skol pa motibu di su nashonalidat.

Nunka e no a haña amor di tata i no tabatin e figura aki. Semper el a trata na traha pero debí na e situashon di su pianan e no por haña trabou. E abogado a pidi korte pa tene kuenta ku esakinan i redusí e kastigu. Hues de Kort ku mester a tuma un desishon a duna di konosé ku e por komprondé e situashon di Servania i e sa ku bèrdat na Kòrsou ta difísil pa haña trabou, pero no imposibel.

Segun hues no ta normal ku ta tuma maleta serka deskonosí i chek in sin sa kiko tin den e ekipahe.

Hues a duna di konos’é ku mirando ku e akusado no ke duna informashon di esun ku a dun’e e maleta, esaki ta pone ku tur e peso ta baha riba dje.
Hues a bisa ku e situashon personal di e akusado no ta hustifiká su echo.
Mirando tur esakinan hues a bisa ku e no ta mira motibu pa desviá for di e demanda di fiskal, i ta bai di akuerdo ku esaki.

Bron: Extra