WILLEMSTAD,- ‘ Na momentu ku ulanda ta tuma su responsabilidat den kuadro di Statüt, ta mira disputa den Reino Ulandes.” Asina parlamentario ulandes Ronald van Raak a deklará.

Segun Van Raak un areglo di disputa ta konektá ku Statüt di Reino Ulandes. ‘ Por ehèmpel, ora Ulanda den su funshon pa garantisá bon gobernashon ta duna un ‘aanwijzing’.

Esaki ta kousa doló den otro pais di Reino Ulandes, ku ta Kòrsou, Aruba i St. Maarten. Statüt ta e orígen di e diferente disputa ku nos a mira den e último añanan.

” Van Raak a bisa ayera durante reunion den kuadro di kontakto interparlamentario IPKO tokante instalashon di un areglo di disputa. Segun parlamentarionan di Kòrsou, Aruba i St. Maarten no por t’asina ku Ulanda ta tuma desishon pa koregí otro pais, sin posibilidat pa kontrolá e base hurídiko di e desishon na un órgano independiente. P’esei parlamentarionan di Kòrsou, Aruba i St. Maarten a presentá un proposishon pa un órgano independiente ku por bin ku un veredikto.

Parlamentarionan ulandes no ta di akuerdo ku esaki. Van Raak a reakshoná riba e diskushon: ‘Na mi opinion den futuro nos lo mira mas deliberashon polítiko den Reino.” Van Raak ke evitá esaki. Ulanda tin su mes proposishon tokante instalashon di un areglo di disputa. Van Raak a splika ku su intenshon ta pa studia e dos proposishonnan hopi bon. Su deseo ta pa forma un proposishon final ku lo kombení tur pais den reino. ‘Intenshon di un areglo di disputa mester ta ku tur pais ta konfirmá nan mes na reglanan ku ta konta den Reino Ulandes”, segun Van Raak.

Bron: Extra