WILLEMSTAD.- Bastante ta e espektativanan pa tratamentu dje kaso Maximus mañan den sala di korte, spesialmente kiko e kondenado na bida largu, Elvis “Mònster” Kuwas lo bisa komo testigu.

Kaso Maximus ta e investigashon rondó dje sospechosonan intelektual tras di morto di lider polítiko di partido Pueblo Soberano, Helmin Wiels dia 5 mei 2013.

Djadumingu KLM a baha ku Kuwas abordo na Bonaire, kaminda e ta será. Djárason e tin di aparesé den sala di korte komo testigu den e kaso  dje akusado Burney “Nini” Fonseca. Nini ta ser akusá di a tuma plaka serka intelektualnan pa paga hende pa mata Wiels. P’e kaso aki tin un tim di fiskal entre otro mr. Rip i tambe eks AG, van der Schans.

For di 7 ougùstùs 2014 ku a trata e kaso Magnus, na momentu ku a pone Nini den libertat, fiskal Rip a papia. Nos ta hasi un kompilashon di tur loke fiskal a bisa den ougùstùs 2014

Morto di Wiels

Den ménos ku 10 sekònde Wiels a pèrdè su bida, segun outopsia a revelá. E melding na polisnan tabata bisa: “nan a tira Helmin Wiels. Un gai flanèl shinishi manga largu, djins i kapuchon riba kabes. El a drenta den outo koló di oro i a bai den direkshon di Koraal Specht. E hòmber ta bentá mi dilanti manda ambulans”.

Wiels a muri dor di bala ku a drenta tantu su man i pia drechi. E tabatin 10 kanal ku ta dor di esaki tabatin herida na kurason, i kolumna vértebra. A base di e heridanan, Wiels a haña sangramentu profuso di paden. Su órganonan a sufri daño. Ku e heridanan kousá na kurason, e morto a drenta rápidamente. Ta kuestion di sekònde, no minüt, ku mesora Wiels a pèrdè su bida.

Deklarashon fiskal Rip 7 ougùstùs 2014

Dia 7 ougùstùs 2O14, Rip a papia riba kontakto hopi dudoso entre eks-minister Jamaloodin i Nini. Nini ta ser señalá pa tres akusado i testigunan den kaso Magnus komo esun ku a paga pa ehekutá morto di Wiels.

Segun fiskal e investigashon di outornan intelektual ta tuma lugá den kaso Maximus. Den Maximus ta señalá Robbie D.S. i Jamaloodin komo esnan ku a paga pa mata Helmin Wiels.

Tumamentu di  plaka

Fiskal a sigui bisa: Jamaloodin tin kontakto ku Nini. Nini vários biaha a bai serka Jorge. Tin deklarashon ku ta bisa ku Nini a drenta serka Jorge man bashí i sali ku hopi plaka. No solamente Nini  a tuma sèn serka Jorge, pero tambe despues ku Nini a kai será, su otro ruman hòmber tambe a bai tuma plaka serka Jorge pa Nini.

Kontakto SMS Nini i Jorge

Fiskal a bisa den mitar di 2013 tabatin hopi informashon SMS entre Jamaloodin i Nini. Fiskal Rip  a menshoná un SMS di dia 30 aprel 2013 entre Nini i Jorge.  Nini ta bisa Jorge: “unda mi por wak bo, mi ta kla pa traha, e unifòrm ta kla”. Pero nunka Nini no a traha pa Jorge.

Den e promé mitar di 2013, tabatin 40 kontakto di SMS entre Jorge i Nini. Dia 4 mei, tabatin kontakto entre Nini i Jamaloodin. Jamaloodin ta puntra Nini na unda e ta, pa e por pasa pa papia kuné. Nini ta bai serka Jorge na su kas. Dia 4 mei e último kontakto di SMS tabata den kareda di 18:54. Den e periodo di yanüari pa 4 mei tabatin kontakto i riba e anochi di morto di Wiels, di forma abrupto e komunikashon ta stòp, segun fiskal Rip.

7 ougùstùs 2014 fiskal Rip a bisa ku e investigashon kontra Nini no ta kla i tabatin mitar trabou. E tabatin mester di mas tempu. Awor ta parse ku fiskal ta kla ku su trabou. I ta di mira si tur loke ku fiskal a bisa dia 7 ougùstùs 2014 ta mas mihó supstansiá ku prueba. Nini ta sintando kastigu na Ulanda pa kaso di droga. Nini no ta bin Kòrsou pa su kaso pero lo sigui esaki via di “videoconference”.

Kuwas ta sintando kastigu bida largu tambe pa asesinato di Raikel Conception dia 27 yanüari 2013 i Lionel Arnaud dia 8 yüni 2012. Pa morto di Wiels e lo mester a haña Naf.100.000.-

Bron: Extra