WILLEMSTAD.- ‘Awor aki nos tin un situashon kaminda inesperadamente nos ta enfrentá un kantidat di ilegal ku ta na Kòrsou. I e kos mas lamentabel ta ku den esnan ku nos a gara ilegal ei tin hopi kriminalnan venezolano tambe nos mester atendé ku nan.”

Asina minister di Hustisia Nelson Navarro ayera a splika den komishon sentral di Parlamento di Kòrsou. El a reakshoná riba e problema ku Kòrsou ta konosé awor aki ku baraknan den mal estado i un kantidat grandi di ilegalnan.

‘Gobernashon ta nifiká pone prioridat. Gobernashon ta nifiká hasi eskoho. Tin baraknan ku mester wòrdu renobá i drechá. Naturalmente mi ta spera ku minister di Hustisia nobo por start na un manera hopi bon. Ku ta nifiká, entre otro, ku e tin baraknan nobo i drechá, ora aña habri. Pero nos ta den un situashon agudo ku nos mester traha lugá pa tur esnan hòmber ei den SDKK ku nos ta gara pa sera nan. Esnan femenino nan por bai na nan barak tanten.”

Segun Navarro ‘mester yega ku un areglo ku InselAir ku dentro di dos òf tres dia mester saka ilegal. Ku esaki nos ta manda un señal fuerte afó: Bosnan a drenta Kòrsou ilegal, rápidamente nos ta gara bo. Esnan ku a hasi aktonan kastigabel, nos mester sera nan. Tur otro ku ta ilegal, den dos dia nan mester bai for di Kòrsou. Anto den e direkshon ei nos ta trahando.”

Bron: Extra