WILLEMSTAD. – E sospechoso femenino Z.L. a ayera a drenta su periodo di kustodia. E sospechoso a keda resientemente detené pa entre otro estafa. Ayera Wes-komisario a ordená kustodia ku 8 dia mas.
Esaki pa motibu ku tin nesesidat pa investigashon i tin indikashon ku tin mas denunsia na kaminda kontra di e sospechoso. Aktualmente tin 13 denunsia kontra L. na polis pa estafa i malversashon.
E modus operandi di e señora aki tabata ku e ta bestèl outo pa su klientenan. Pero tempu ta pasa i nada di outo. Un grupo di mas o ménos 13 persona a entrega keho kontra di e señora aki ku a kondusí na su aresto.
El a keda detené 5 di yüli 2017 pa 11’or di mainta na Warda di polis Rio Canario pa estafa den kompra di outo pa hende i falsifikashon di dokumento. Despues di a prolongá su detenshon pa e promé 8 dianan, ayera Wes-komisario a bolbe prolongá su detenshon ku 8 dia mas pendiente mas investigashon di parti di polis.
Manera ya menshoná, ta papia aki di un grupo di 17 persona ku a entrega keho kontra di L. kende a tuma nan sèn pa bestèl outo pa nan for di Hapon, pero te ainda e vehíkulonan no a yega Kòrsou.
A aserká e kompania ku e señora ta dil kuné, pa buska outo for di Hapon, mirando ku den pasado tabatin bon resultado. Sinembargo kosnan no a bai bon último tempunan. Loke ta tristu den e kaso aki ta ku hopi di e víktimanan sea a paga kèsh òf a manda sèn riba un kuenta. Tin hende ku a paga e preis kompletu, tin ku a paga mitar.’
Ta trata di montantenan di entre 5000 i 15.000 Naf pa persona. Despues di pagamentu ta haña for di señora L. un number di ‘BF’ for di Hapon, kua ta e modèl di outo. Despues nada a pasa. Awor ku L. ta tras di trali investigashon mester saka afó kiko el a hasi ku e plaka.
Bron: Extra