WILLEMSTAD.- Hunta di Komisario di Banko Sentral di Kòrsou i St. Maarten a pidi gobièrnunan di pais di Kòrsou i pais St. Maarten pa retirá presidente Emsley Tromp. Hunta a duna Tromp oportunidat pa retirá promé ku promé di sèptèmber.

Pero Tromp a ninga, asina Hunta di Komisario di Banko Sentral a duna di konosé den un komunikado di prensa ayera. Den e komunikado tin skibí ku Hunta di Komisario i tambe paisnan di Kòrsou i St. Maarten ‘a sinti e nesesidat, banda di sigui kana ku prosedura di retiro, pone un medida di órden ku Tromp mester stòp ku tur su aktividatnan pa ku e banko.

Tambe ta ninga Tromp entrada riba tur tereno i edifisio di Banko sentral. Alberto ‘Chos’ Romero atrobe ta presidente di Banko Sentral. Personal di e Banko a keda informá tokante esaki.’

Manera ta konosí Tromp ta keda akusá di vários aspekto den un kaso penal ku yama “Saffier”. Dianan 26 i 27 di òktober e kaso lo keda tratá den korte i si no keda kla ku e kaso despues di dos dia, esaki lo sigui riba dianan 30 i 31 di òktober. Hunta di Komisario ayera a manda un komunikado pa informá pueblo tokante e motibu pakiko nan a pidi retiro.

Segun Banko no ta aseptabel ku presidente ta keda den su funshon mas. Segun e banko ‘spesialmente di un presidente di un Banko Sentral no mag di tin niun duda tokante su integridat.

E investigashonnan penal kontinuamente ta duna daño na reputashon di Banko Sentral.’ Den e komunikado tambe tin skibí ku investigashonnan di seguridat resientemente a mustra ku Tromp lo no haña un deklarashon di no opheshon.

Bron: Extra

Emsley Tromp a disidí inesperá pa reanudá su trabou

WILLEMSTAD,- Despues di un periodo di kasi un aña Emsley Tromp djabièrnè pasá a tuma desishon inesperá pa reanudá su trabou komo presidente di Banko Sentral. Riba e dia ei Tromp a purba pa tuma algun desishon importante i tambe pa reverti un desishon.

Un di e desishon supuestamente tabata pa firma un kontrakt pa Jerry Hasselmeyer por fungi komo presidente pa e siguiente 5 aña. Manera ta konosí resientemente Hasselmeyer a tuma despedida komo presidente interino. Aktual presidente interino ta Alberto ‘Chos’ Romero.

Minister di Finansa Kenneth Gijsbertha ayera anochi no por a duna detaye tokante e desishonnan ku Tromp a firma. Pero el a splika ku Hunta di Komisario i ‘vermogensgerechtigden’ no ta kompartí ku e desishonnan. Esei ta nifiká ku nan lo wòrdu distruí pa tantu Hunta di Komisario komo mandatarionan nobo. Pa esaki awor ta buskando konseho hurídiko.

Bron: Extra

Editorial: Emsley Tromp no tin rèspèt pa pueblo!

E aktuashon di Emsley Tromp (presidente) Banko Sentral di Kòrsou i St. Maarten ta un falta di rèspèt total pa pueblo. I asta nos por kalifik’é komo un bèrgwensa pa Reino. Tromp a disidí ku djabièrnè e ta bai Banko Sentral pa reglá algun kos. Ta kiko e lo por tin di reglá, siendo na kas basta luna kaba? E persona di Tromp ku semper Kòrsou a broma kuné, un yu di pueblo humilde ku a krese bira presidente di un banko sentral a keda mancha di e forma aki.

Un falta di rèspèt total sr Tromp!

Tromp a regresá Banko Sentral miéntras ku e tin dos proseso den korte ta andando i ku tabata motibu ku a dun’é tambe fakansi obligatorio for di promé instante. E aña aki e servisio di inteligensia di St. Maarten, VDSM a duna un konseho negativo indikando ku Tromp no a pasa screening i no por ta direktor di e banko. Despues di a optené e konseho di VDSM Tromp a hiba gobièrnu di St. Maarten i e servisio di inteligensia korte. A posponé tratamentu di e kaso aki na algun okashon kaba.

Tambe Tromp ta envolví den un kaso penal. E tim ku ta mina kriminalidat TBO a hasi un investigashon kontra Tromp relashoná ku froude ku impuesto, falsifikashon di dokumento i labamentu di plaka. Ministerio Públiko entre tantu a disidí di persiguí Tromp pa froude ku impuesto i a hiba e investigashon kontra dje korte. Posiblemente lo persiguí Tromp mas despues pa e dos otro sospechonan di falsifikashon di dokumentu i labamentu di plaka.

I no por pone un banda e karta di e dos komisarionan ku a bai pa minister di finansa, ku akusashonnan hopi fuerte kontra di Tromp pero tambe kontra di otro miembronan di e hunta di komisario entre otro asuntu di suma formal di plaka pa drecha penshun di un di e miembronan di komisariado ku porsierto tabata ku penshun kaba.

Tempu ku gabinete Schotte kier a tuma medida kontra Tromp, hopi a kasi kome nan pasobra ke tuma paso kontra di un yu di Pueblo, awe a sali na kla ku no tabata un wega polítiko, ni un asuntu di MFK i ménos di Ministerio Públiko, pero ta un chanchuyo ku e propio Tromp a hinka su mes aden i ku a sòru pa daña nòmber di Kòrsou internashonalmente.

Tromp a sòru pa e tiki rèspèt ku pueblo por tabatin pe, a keda di “crush” ku e último intento di siman pasá, hasiendo komosifuera nada ta pasando.

Henter e situashon aki mester keda atendé hopi pura pa gobièrnunan di Kòrsou i St. Maarten, pasobra Kòrsou su nòmber ta lastrando te na suela internashonalmente. Kòrsou tin sufisiente ku un situashon ekonómiko ku ta bayendo di ‘guatemala pa guatapeor’. Mester krea konfiansa bèk serka invershonistanan, Kòrsou mester drecha su nòmber bèk. Awor si ta sufisiente, nos no por sigui den e bèrgwensa aki!

Bron: Extra