WILLEMSTAD.- Hustisia a vense, no wak e plaka. Despues di tantu roga aki aya, hustisia a prevalesé. Esaki tabata palabra di pareha di Edson i Maureen Verginie-Rosalina, kendenan ta víktima di e muraya ku a basha bou dia di marcha despedida di karnaval 4 mart 2014.
Sra. Maureen a haña dwarslaesie, despues ku e muraya a kai riba dje. E señora a bai wak karnaval ku su famianan ku a bin for di Ulanda, i a terminá den rolstoel. Despues di a aserká gobièrnu na numeroso okashon pa yudansa di su situashon, esta adaptashon na su kas i pa kubri otro gastunan, sin oido, señora Maureen a entamá un huisio sumario kontra di gobièrnu, unda ta pidi korte pone gobièrnu responsabel pa no a tuma medida di manera ku no por a para dilanti di e muraya aki. Pasobra gobièrnu tabata sa ku e muraya ta dekaí. Korte a honra señora Maureen su petishon i tambe a dun’é un voorschot di 250 mil florin.
EXTRA a papia ku tantu e kasá komo e señora. Nan a bisa di a aserká gobièrnu i mandatarionan vários biaha pa huridikamente regla Maureen su kosnan. Pero nan ta bira. Esaki ta un ehèmpel ku derecho humano i hustisia a vense. No wak e plaka, e pareha a indiká.
“Hustisia prevalesé, hopi abusu, kada biaha mi ta roga pa yudansa. Un kaminda e kosnan mester kuminsá. E ta un kaminda largu ku mi a bringa ku doló. Di mes mi tin mi doló. Bo ta den rolstoel kaba. E sentensia tabata bon bon i no ta falta nada. E ta un bon komienso”.
Señora Verginie a bisa ku e tin di sigui terapia na laman, gym, i ta den Fundashon Alton Paas. E no por sinta ketu, sino e ta haña otro problema ku ta trombose i e tin di move pa no haña mas problema. Ademas t’e señora mes tin di paga gastunan di terapia, ya ku SVB no ta kubri tur kos.
Dia e kaso a keda tratá dos siman pasá den sala di korte, e señora a bisa ku e tin di lucha pa su pianan ku e no tin i su salú. Pero el a disidí di lucha pa su salú i su kasá i yunan pa su pianan. E tin keho konstante di su pianan ku ta hincha, doló den barika, ‘blasonsteking’. 26 dia promé ku e echo a sosodé, e mester a baha ku penshun ku su 60 aña. E tabatin hopi plan di bai Ulanda pa wak su nietunan, bai trep di barku ku su kasa. Tambe a pidié p’e keda trabou i el a pensa pa hasi esei. “Ora mi kasá sali bai traha, mi so ta keda den kas wak kuater muraya. Mi no por hasi nada. Si mi kai, mi no por lanta bòk”, sra. Verginie a konta. Awor e señora tin un satisfakshon despues di 2 aña. No ta konosí si gobièrnu lo bai un prosedura a fondo manera nan a indiká den korte durante tratamentu dje kaso.
Bron: Extra