WILLEMSTAD.- Inter-Continental University of the Caribbean (ICUC) a entrega un kaso kontra di Carl Camelia pa uso di kasi mesun nòmber ku e universidat ku ta situá na Brionplein.
Esaki a keda konfirmá pa EXTRA dor di sr. Gilbert Cijntje di ICUC.
El a bisa ku for di desèmber nan abogado a entrega un petishon pa un kaso kontra di sr. Camelia pa uso di nan nòmber. Ainda ICUC ta wardando un fecha di korte pa tratamentu di e kaso tuma lugá. E nòmber di sr. Camelia ta trese konfushon grandi. Ya kaba tin hende ta konfundí ku e nòmbernan, i esaki nan por tuma nota di dje ku yamadanan ku ICUC ta risibí.
E universidat di sr. Camelia ku ta ICUC International (ICUC Int’l) B.V. ku próksimamente lo duna estudio Bachelor in Policing pa polis. E tim di maneho di ICUC International (ICUC Int’l) B.V., direktor general Carl Camelia, direktor di enseñansa Jeanine Cozijns-Isenia, i direktor di Internashonalisashon Emilio Ferrero.
Anteriormente den un rueda di prensa, a splika ku a konstituí ICUC Int’l riba 24 di mei 2013, despues ku a laga Büró pa Propiedat Intelektual di Kòrsou investigá si tin algun persona o instituto ku tin derechi riba e nòmber i basá riba resultado negativo di e investigashon aki, a registrá e nòmber “Intercontinental University of the Caribbean (ICUC)”. For di aña 2013 ta duna lès na e lokalidat di St. Martinus University na Scherpenheuvel. ICUC Int’l a duna kurso di entre otro Kontabilidat pa BAB, Pre-University English pa Latinonan, i vários kurso den Medisina Integrativo ku ta un di e spesialidatnan di ICUC Int’l.
Segun Camelia a splika e dia ku e universidat tin 24 estudio rekonosé ofisialmente pa medio di un Dekreto Ministerial (estudionan di Bachelor) i un Dekreto Nashonal (Landsbesluit) pa esnan na nivel di Master i Doktorado.” Pues pronto lo tin tratamentu di e kaso aki den korte.
Bron: Extra
Intercontinental University of the Caribbean (ICUC) i ICUC International (ICUC Int’l) B.V. ta dos organisashon diferente. Mayoria di hende lo pensa ta papia di mes un instituto of, por lo menos, e dos organisahonnan aki lo tin un relashon ku otro. Awor ta sali na kla ku esey no ta e kaso.
St. Martinus University Medical Faculty (!!) na Scherpenheuvel, na aña 2010, ta tin dificultat pa haña un lisensia pa opera. Por ta posibel ku a konstrui pa medio di ICUC Int’l un aparensia i pesei ta bisa ku ICUC Int’l ta duna vários kurso den Medisina Integrativo?
E studiantenan na e internaat di Scherpenheuvel ta bai St. Martinus University Medical School. Nada ku ta munstra aktividatnan otro (Kontabilidat pa BAB of Pre-University English pa Latinonan).