WILLEMSTAD.- Den e último simannan tabatin hopi atenshon pa e instituto ICUC Internashonal, ku lo duna estudio Bachelor in Policing pa polis.
Ayera pa promé bia e tim di maneho di ICUC International (ICUC Int’l) B.V., direktor general Carl Camelia, direktor di enseñansa Jeanine Cozijns-Isenia, i direktor di Internashonalisashon Emilio Ferrero, a duna un konferensia di prensa for di nan edifisio di enseñansa, St. Martinus University na Scherpenheuvel. Nan a splika kiko ta e ICUC Int’l i tokante e Bachelor in Policing. E instituto a haña hopi atenshon negativo e último tempu.
Ayera a splika ku a lanta ICUC Int’l basá riba e maneho nobo di Ministerio di Desaroyo Ekonómiko di Kòrsou yamá Edukashon Trasnashonal ku tin komo meta pa inová ekonomia di Kòrsou atraves di desaroyá i promové Turismo di Edukashon. Ta eks minister Yasser Hakim di MFK a bini ku e idea aki na 2010.
A konstituí ICUC Int’l riba 24 di mei 2013, despues ku a laga Büró pa Propiedat Intelektual di Kòrsou investigá si tin algun persona o instituto ku tin derechi riba e nòmber i basá riba resultado negativo di e investigashon aki a registrá e nòmber “Intercontinental University of the Caribbean (ICUC)”.
For di aña 2013 ta duna lès na e lokalidat di St. Martinus University na Scherpenheuvel. ICUC Int’l a duna kurso di entre otro Kontabilidat pa BAB, Pre-University English pa Latinonan, i vários kurso den Medisina Integrativo ku ta un di e spesialidatnan di ICUC Int’l.
Camelia: ‘Nos tin 24 estudio rekonosé ofisialmente pa medio di un Dekreto Ministerial (estudionan di Bachelor) i un Dekreto Nashonal (Landsbesluit) pa esnan na nivel di Master i Doktorado.”
Den kuadro di Edukashon Trasnashonal, sr. Emilio Ferrero ku ta direktor di internashonalisashon di ICUC Int’l a splika ku nan tin konvenio será kaba ku universidatnan na
Venezuela, Colombia, Paraguay, Bolivia, Madrid, Barcelona i Jamaica. E strategia ta ku ta ofresé estudionan huntu bou di dòbel titular, kaminda e studiante mester hasi parti di su estudio na Kòrsou, en bes di para warda ki dia un studiante ta interesá pa bini Kòrsou.
Bron: Extra