WILLEMSTAD. – Abogado mr. Hubert ‘Berti’ Braam tabata tèrko den su reakshon riba e pregunta, kiko e ta pensa di e konseho di Ministerio Públiko pa loke ta trata un investigashon mas profundo pa loke ta trata integridat di su kliente Michael Römer hefe di Servisio di Inteligensia di Kòrsou.

Braam a duna di konosé ku na unda Ministerio Públiko ta sali ku un konseho asina.

Esei no ta kai bou di e tarea di Ministerio Públiko. Nan a investigá aspektonan i echonan penal, no a haña nada i kla.

Pero loke ku Braam a keda mas asombrá, ta e echo ku den e mail ku el a haña di parti di Ministerio Públiko, relashoná ku e resultado di e investigashon di Römer, niun kaminda ta hasi menshon ku mester bin ku un investigashon di integridat. E loke ku el a haña ta bisa ku no a haña nada di echonan penal kontra di su kliente.

Saliendo for di e punto di bista aki, ya Braam a formulá un karta pa e ministernan konserní pa Römer regresá su porta di trabou bèk.
Awor den media e ta tende ku Ministerio Públiko a konsehá Minister pa un investigashon mas profundo pa loke ta trata integridat.
E kos aki ta inkreibel, Braam a bisa EXTRA.

Su karta a sali awe pa Minister pa su kliente bai bèk trabou, pa motibu ku ofisialmente e no a haña nada di Ministerio Públiko tokante mas investigashon relashoná ku integridat.

Si esei ta e kaso, no por ekskluí e posibilidat di un huisio sumario.

Bron: Extra