WILLEMSTAD.- Minister di finansa sr. Gijsbertha a indiká ku no tabata fásil pa a duna konseho riba e krédito di 33 mion florin pa InselAir. Departamento di finansa a pone kondishonnan estrikto.
A base di di e trabou ku e Komishon InselAir realisá, a konkluí, ku esaki ta e mihó desishon ku por hasi. Esta di fia InselAir 33 mion florin, P’esei e kondishonnan estrikto tambe a bini ku e 33 mion florin aki. E kondishonnan estrikto ta e diferente komisarionan ku di gobièrnu ku ta bai den e Hunta di Komisario i tambe den e tim di maneho.
Anteriormente for di den luna di desèmber 2016 gobièrnu a fia InselAir 3 mion florin i djabièrnè último na momentu ku a firma e akuerdo, InselAir a haña 5.6 mion florin. E sèn aki no ta pa paga debe bieu, sino pa gastunan operashonal manera mantenshon di avionnan i tambe salario.
Mas aleu sr. Gijsbertha a bisa ku enbèrdat InselAir tin debe di primanan sosial, pero e debe aki ta vris esei. Mester bini ku un plan, kon ta bai atendé eseinan despues ku e kompania sali for di su situashon di perkanse.
Di su banda sr. Etienne Ys, presidente di Komishon Insel a indiká ku ora ta papia di konektividat pa nos pais i di islanan ABC (Aruba, Kòrsou i Bonaire), esaki ta 100% entre Kòrsou i Aruba i visevèrsa i meskos Kòrsou ku St. Maarten. Si no tin InselAir no tin ningun otro konekshon for di Kòrsou p’e paisnan aki i visevèrsa, miéntras ku pa Bonaire esaki ta 80% di konekshon.
Meskos ta konta pa paisnan den Suramérika manera Sürnam i Colombia, e konekshon ta bai via di InselAir. Pues e konektividat ta bai mas leu ku solamente islanan ABC, pero ta ABC Plus.
Den e inyekshon ku gobièrnu a hasi den InselAir, a pone kondishon ku gobièrnu tin un tim di maneho i tambe miembronan den e hunta di komisario. Pa loke ta trata e ehekutivonan di tim di maneho tin sr. Giles Filiatreault ku ta e presidente ehekutivo. Sr. Filiatreault a yega ayera Kòrsou pa kuminsá traha mesora. sr. Ys a splika ku sr. Filiatreault su ekspertisio ta di lanta kompanianan ku no ta bayendo bon.
Bron: Extra