WILLEMSTAD.- InselAir lo bolbe pidi alargashon di suspenshon di pago den korte. E kompania ta avansando poko poko. Ya kaba nos mes por paga salario di trahadónan i nos ta kere ku nos por paga otro debenan tambe, ta loke ku direktor di InselAir Sr. Edward Heerenveen a duna di konosé na EXTRA.

Sr. Heerenveen a splika ku nan a kuminsá traha kaba riba e proseso pa e avion MD80 por pasa su “C-chek”. Algun siman atras minister enkargá ku asuntunan di aviashon Sra. Zita Jesus-Leito a bisa ku e departamento di aviashon sivil i InselAir a yega na akuerdo pa e avion MD80 por a hasi su “c-chek” i asina esaki ta kla e por ta den laira, i pa fortifiká e kompania di aviashon. Sinembargo InselAir mester a kumpli ku algun rekisito p’e kontrol tuma lugá.

Mas aleu Sr. Heerenveen a indiká ku e ta spera ku pa fin di luna di ougùstùs i kuminsamentu di sèptèmber, e MD80 ta kla pa lanta buelo. “Nos lo kuminsá poko poko i no rápido manera a sosodé den pasado. Ta e intenshon pa nos kuminsá bula St. Maarten, Sto. Domingo, Sürnam i Jamaica. Nan ta e buelonan di prioridatnan pa InselAir”. Ta e intenshon ku despues lo pone un di dos MD80 den funshon.

Sr. Heerenveen a bisa tambe ku nan ta mira un adelanto di e kompania, despues ku a baha hende. e kompania por paga salarionan di e luna aki, debí ku nan no ta haña plaka mas di gobièrnu, esta for di e 33 mion florin. Tambe nan ta mira ku e kompania por karga su mes awor.

InselAir lo hasi petishon pa alargá e suspenshon di pago na korte, kual prosedura a keda alargá un biaha kaba pa 25 di ougùstùs awor. Sr. Heerenveen ta konvensí ku wes i kreditornan lo por honra nan petishon, debí ku e kompania di aviashon ta drei i ta desaroyá su mes bon. Nos ta mira un lus na horizonte, ta loke ku Sr. Heerenveen a indiká.

Riba palabrashonnan ku Avianca komo partner stratégiko pa InselAir, Sr. Heerenveen a bisa ku e no por duna detaye, debí ku ta otro grupo ta atendé ku esaki.

Dia 24 di febrüari di e aña aki e dos kompanianan Goddard Catering Group Curaçao BV i Jet Power Aruba Aircraft and Transit Company N.V,, ámbos kompania establesé na Kòrsou a entrega petishon pa deklará InselAir bankarota. Pero InselAir a hasi petishon di suspenshon di pago i kual wes a honra dia 14 di mart último. Dia 9 yüni último partidonan mester a bai korte pa raportá kon a para, pero a posponé e kaso te pa 25 ougùstùs próksimo. Manera ariba indiká, ku InselAir a bolbe pidi alargá e prosedura di suspenshon, pasobra e kompania ta moviendo pa dilanti, segun e direktor.

Bron: Extra