WILLEMSTAD.- Kompania InselAir awor ta riba bon kaminda atrobe. “Nos ‘on time performance’ ta bon, ku ta nifiká ku mas ku 80 porshento di nos buelonan ta sali i yega na tempu.”
Asina CEO suplente Juni Sluis a splika EXTRA. Problema ku e diferente buelonan i tambe situashon finansiero hopi difísil, resientemente a urgi e kompania pa bai bèk na base. Ku ta nifiká bula entre Kòrsou, Aruba, Bonaire i St. Maarten so. Aña pasá InselAir a bula riba 23 destinashon diferente. Sluis ta atmití ku InselAir a pasa dor hopi kambio.
“Awor nos tin trankilidat i esaki ta bon. Pero tòg ayera a disidí pa regresá un buelo ku tabata bayendo Aruba. Esaki debí na un instrumento ku no a funshoná. Esaki no ta algu hopi serio. Pero na e momentu ei nos ta riba tur kos. Tur kos mester sigui segun plan. Nos ta hopi kouteloso.”
Segun Sluis InselAir ta pone hopi énfasis riba su responsabilidat. “Nos tin komo tarea, ku den e próksimo 2 lunanan, nos tin ku bin ku mas destinashon. Nos ta preparando pa esei. Esaki lo bira e siguiente fase.”
Evaluando e desaroyonan di último lunanan, Sluis ta bisa: “Na promé instansia nos a stòp di bludu i nos a haña un akuerdo ku gobièrnu di Kòrsou. Tambe un plan di stabilidat a keda introdusí. Esaki a duna trankilidat. Awor nos tin un kantidat di destinashon limitá, pero nos ta bula na tempu i na òrdu. Komo konklushon mi por bisa ku nos ta riba bon kaminda. Pero nos ta keda hopi kouteloso.”
Bron: Extra
Te ainda no tin klaridat tokante demanda di Swift Air kontra InselAir
WILLEMSTAD.- Manera ta konosí e kompania Swift Air resientemente a entregá un demanda kontra InselAir na Florida alegando ku e kompania a keda sin paga mas di 200 mil dòler pa buelonan ku e kompania a ehekutá pa InselAir. Swift Air a entregá e demanda na Dade County, Florida. Te ainda desishon no a kai tokante e demanda. Juni Sluis, ku ta aktual CEO (Chief Executive Officer) suplente, ta konfirmá ku e ta na altura ku Swift Air a hasi petishon na Dade County pa kuminsá ku un kaso den korte kontra Insel Air.
“Esaki tin di aber ku un debe ku nos tin ku nan”, Sluis a bisa. Segun Juni Sluis no ta asina ku InselAir no a paga Swift Air nada. “Nos a paga un parti di henter e montante. Awor nan ke haña e restante. Na Merka no ta posibel pa pone beslag riba nos sèn. Nan tin ku pidi un kaso den korte.” Segun informashon di e ofisina di Miami di e Florida Southern District Court dia 22 di mart Swift Air a entregá petishon pa un kaso den korte, pero te ainda nan no a haña lus bèrdè pa sigui ku un ‘court case’.
Sluis: “InselAir awor ta den un situashon difísil. Nos a haña suspenshon di pago, ku ta nifiká ku nos tin protekshon pa nos no bai bankarota. Swift Air tin ku warda te e momentu ku nos tin sufisiente sèn atrobe, pa paga tur kreditor. Te n’e momento ei nos curator ta disidí ken lo haña nan sèn.”
InselAir tres luna pasá a disidí pa ‘lease’ avionnan di otro kompanianan manera Swift Air. Segun e demanda, dia 14 di yanüari 2017 e dos partidonan a yega na un akuerdo ku tabata e base pa Swift Air operá un serie di buelo pa InselAir for di aeropuerto di Miami. InselAir no a kumpli ku e pagonan akordá. Swift Air ta pone InselAir BV responsabel. Swift Air ta eksigiendo un demanda ku presensia di un ‘jury’, i ta eksigiendo pago pa un suma di $202,221.40, plùs interes, gastunan di abogado i otro dañonan ku Korte ta konsiderá ku ta hustu.
Bron: Extra
