WILLEMSTAD.- Trahadónan di Wardakosta no ta muchu kontentu ku desaroyonan ku nan ta tumando nota di dje. Nan reakshon ta riba un komunikado resientemente di ministerio di hustisia ku a bisa ku tin solushon pa trahadónan di Wardakosta.

Minister di Hustisia a hasi un bishita ofisial na Wardakosta na fin di yanüari. Durante di su bishita a bini dilanti e inabilidat di e Ministerio pa formalisá posishon hurídiko di empleado i e establesimentu di un Büró Kustwachtzaken.

E trahadónan ta bisa ku pa hopi aña kaba tin vários pregunta i insertidumbre tokante di e büró aki pasobra for di 2011 tin trahadónan di Ministerio di Hustisia ku bou di e nòmber di ‘Bureau Kustwachtzaken’ ta enkargá ku derechi di empleadonan di Wardakosta.

E trahadónan ta bisa ku esaki no ta sosodé i tin biaha hasta strobá. E preguntanan tokante di e büró aki a keda entregá den un karta personal na Minister dor di tres trahadó di Wardakosta.

Grandi tabata e sorpresa ora a tuma nota di e komunikado di Ministerio di Hustisia den diferente medio di komunikashon tokante Bureau Kustwachtzaken.

E komunikado ta indiká ku lantamentu di e Bureau Kustwachtzaken ta den su fase final i ku denter di poko esaki lo bira un realidat, segun e Minister di Hustisia. Den e artíkulo tambe ta papia di e echo ku denter di poko lo tin un solushon pa tur empleado di Wardakosta, i esaki ta e dicho Bureau Kustwachtzaken.

Tambe ta sigui bisa ku e Minister huntu ku e komishon ku ta representá trahadónan di Wardakosta a papia di kon lo atendé ku e puntonan di preokupashon di e personal di Wardakosta. Lo a kumbiní ku e komishon ku un dicho ‘Bureau Kustwachtzaken’ lo wòrdu lantá di manera ku Wardakosta por sigui funshoná di un forma strukturá.

Lokual ta para den e artíkulonan aki no ta kuadra ku realidat. E reunion di 16 di febrüari den kua e empleadonan di Wardakosta a trese nan preokupashon dilanti a bai over di e manera ku e Bureau Kustwachtzaken a keda lantá sin partisipashon di e empleadonan di Wardakosta, tareanan i personal ku lo traha na e büró aki.

Ademas e reunion aki a wòrdu filmá di un manera klandestino. Despues a usa e imágennan pa mustra ku e lantamentu di e Bureau Kustwacht ta bai ku aprobashon i partisipashon di e representantenan. Kategorikamente esaki no ta e kaso. E konfiansa di e trahadónan di Wardakosta en general i di e tres nan ku a wòrdu filmá en partikular, a sufri un daño grandi.

Motibu di e reunion i entrega di e karta tabata netamente pa enfatisá ku pa e trahadónan di Wardakosta ta di sumo importansia pa ta na altura kiko ta wòrdu hasí pa nan òf na nòmber di nan dor di e supuesto ‘Bureau Kustwachtzaken’ i ken ta hasi òf lo bai hasi esaki. Si ta trata di posishon hurídiko, esaki ta toka tur empleado di Wardakosta i nan ke tin e siguridat ku lo trata nan derechi di un manera responsabel. Mester enfatisá ku na e momentunan aki Wardakosta ta funshoná na satisfakshon di tur trahadó i nan ta ehersé nan tareanan di un manera efisiente i kouteloso.

Bron: Extra