WILLEMSTAD.- Ekspektativanan pa 2017 den industria hotelero ku no ta pasando su mihó momentonan e aña aki ta grandi pa loke ta protagonistanan nobo ku por djòin e mundu. Informashon ku nos ta dispone di dje ta bisa ku un grupo chines ta interesá pa kumpra Plaza Hotèl.

Minister Eugene Rhuggenaath a informá den parlamento ku ta kombersando ku un grupo i el a hasi menshon inkluso dje montante di 30 mion florin ku e doño aktual lo ta pidi, un montante di kua un parti grandi lo tin ku bai pa kreditornan lokal i den eksterior.

No ta konosí ainda si e benta aki ora e kristalisá lo inkluí e bognan na Marichi. Informashon adishonal ku nos ta dispone di dje ta bisa ku un grupo merikano ku ta operando un dje hotèlnan mas eksitoso na St. Maarten ta interesá pa kumpra Coral Cliff Hotèl ku ta abandoná aktualmente. E propiedat aki ku ta ubiká na un dje partinan mas bunita di Kòrsou ta den man di famia De Freitas. Nos tin entendí k’e grupo merikano lo ta na Kòrsou próksimamente pa habri negosiashonnan. Aki tambe mester bisa ku gobièrnu den persona di minister Eugene Rhuggenaath i algun kolega minister mas ta na altura dje intentonan dje grupo merikano i a nunsio kaba ku nan lo duna tur koperashon pa e transakshon aki tuma lugá di moda ku por kuminsá traha bek riba e edifisionan di Coral Cliff i habri komo un hotèl di spesialidat.

Por último por informá ku un grupo kolombiano ta negoshando pa kumpra Kurá Hulanda na Otrobanda i Kura Hulanda Lodge na Playa Kalki. Ta trata di un grupo poderoso ku ta manehá un kadena impreshonante di hotèl na Colombia i na otro paisnan di Sur Amérika. Aki por bisa ku e negosiashonnan ta drenta rekta final.

Bron: Extra