WILLEMSTAD.- Invershonistanan di e proyektonan Hard Rock Hotel na Pietermaai i Courtyard Marriott na aria di Rif a tene fin di siman pasá un presentashon na e komishon interministerial ku a lanta ku e meta spesífiko pa trèk proyektonan ku ta pegá ainda.

Minister di Desaroyo Ekonómiko, Steven Martina ta bisa ku ámbos grupo di invershonista di e proyektonan aki a indiká ku tin sierto retonan ainda pa ku e finansiamentu pa inisiá ku e proyektonan. Den e kuadro aki gobièrnu a komprometé su mes pa hasi tur loke ta na su alkanse pa por yuda ku e proyektonan ta bira realisabel. Asina Martina ta bisa.

Gobièrnu ya kaba a sòru pa tur loke ta pèrmitnan nesesario a keda kla. Pero ta bai awor pa e tipo di invershonnan ku netamente un banko di desaroyo por finansiá pa konsekuentemente e proyektonan por sigui kana.

Pa loke ta e situashon ku Hotèl Kura Hulanda i Kura Hulanda Lodge e minister a bisa ku ta hopi leu den e proseso pa un grupo kolombiano kumpra e hotèl. E grupo aki lo trese su propio klientela pa medio di buelonan charter, e minister a deklará.

Bron: Extra