WILLEMSTAD.- ‘Den mundu di salubridat públiko ta polítiko ta instalá reglanan. Ròl di inspekshon ta pa kontrolá ku tur e reglanan ta keda kumplí. Den general bo por bisa ku reglanan na Kòrsou ta bon.

Pero tin hopi problema ku kumplimentu ku reglanan. Esaki ta nifiká ku tin hende ku no ta hasi nan trabou segun regla. Ròl di inspekshon ta pa kontrolá esaki i ku sòru ku tur kos ta keda hasí segun regla.” Asina Inspektor General pa Salubridat nobo Jan Huurman ta splika. Huurman tabata inspektor di salubridat na Kòrsou den añanan 2012 i 2013. Awor e ta Inspektor General. Den aña 2013 el a skirbi un rapòrt di traspaso. ‘Te ainda hopi punto di e rapòrt no a keda introdusí.” Un di e puntonan importante pa Huurman ta introdukshon di sistema di BIG, ku ta un registro pa tur profeshon den salubridat. Segun Huurman introdukshon di BIG ta garantisá un mihó kalidat di kuido pa pueblo.

Desde 2009 gobièrnu, di e tempu ei Antia Ulandes, a aprobá e lei BIG ku ta regla kalidat i tur e faktornan ku ta rekerí pa pèrkurá pa kuido ta di kalidat óptimo (manera p.e. personal, formashon, infrastruktura di ICT). Kòrsou te ku awe no a duna kontenido kompletu na kumplimentu ku e lei aki.

Segun Huurman e kaso di BIG ta un ehèmpel hopi kla: ‘Parlamento a bisa ku mester introdusí BIG. Pero esaki no a tuma lugá.” Huurman ta splika ku komo Inspektor General introdushon di BIG ta un di su tarea prinsipal.

‘Ora nos introdusí BIG nos por hasi demanda na tur hende ku ta traha den salubridat públiko, manera dòkter, fisioterapista etc. Na e momentu ei un médiko ta keda médiko pa semper. Nos no por kontrolá ni eksigí ku un médiko ta hasi rekapasitashon. Si nos introdusí BIG tur médiko mester rekapasitá na un base regular i tambe duna prueba ku nan a rekapasitá. Esaki sigur lo mehora nos sistema di salubridat públiko.”

Bron: Extra