WILLEMSTAD.- Lider polítiko di partido PAR, sra. Zita Jesus-Leito, ta super kontentu ku e resultado di ayera. Kasi por bisa ku e 11.945 votonan a bini di sorpresa, kual a keda tradusí den 4 asiento.

Esei ta nifiká ku PAR a mantené e 4 asientonan ku e tabatin originalmente na 2012. Den un entrevista ku sra. Jesus-Leito ayera nochi na sede di PAR, el a deklará na EXTRA ku e elekshon aki tabata unu pekuliar, esei pa motibu ku tabatin un kantidat relativamente grandi di partido ku a partisipá, pero tambe un kampaña den kual PAR a usa un montante mínimo di fondo.

E por bisa si ku PAR a hiba un kampaña limpi, a enfoká riba e programa di akshon, i tambe riba e logronan ku tabatin den apénas 10 luna di gobernashon. PAR tin un lista di kandidato ku ta kla pa bai traha huntu. E lider polítiko no tabatin forma pa ekspresá su alegria i satisfakshon pa e resultado aki, presisamente despues di un trabou di apénas 10 luna i un partido ku a pasa den un proseso di restrukturashon. El a bisa for di un prinsipio ku PAR lo mester por lo ménos mantené e kantidat di 4 asiento, i esei a sosodé tambe i e ta yama pueblo danki pa e sosten.

Den un gobernashon ku PAR e lo sòru pa no defroudá e pueblo. PAR den un gobernashon lo bai stipulá e prioridatnan pa por mira un adelanto pa pueblo. E promé prioridat naturalmente ta e ekonomia ku mester floresé pa asina reflehá e konfiansa i huntu kuné e invershonnan nesesario. E ta kere ku mester duna atenshon na e parti di enseñansa i tambe e parti sosial. Nunka PAR no tabatin e kartera di asuntunan sosial, pues esei lo ta un reto si mester yega asina leu.

EXTRA a puntra sra. Jesus-Leito kon grandi e faktor di Eugene Rhuggenaath tabata den éksito elektoral, i el a splika ku definitivamente esaki tabatin su impakto. El a logra ku porfin Kòrsou tin un kontrato ku Damen pa desaroyo di Dok. A kaba ku diskushon riba monopolio den haf. Pa loke ta e fase di negosiashon, segun Jesus-Leito ya kaba e tin den pensamentu un tim pa negoshá próksimamente si PAR ser aserká pa drenta un gobièrnu nobo. Pa loke ta preferensia pa traha ku sierto partido(nan), el a deklará ku e no ta ekskluí ningun, aunke e no tin ningun problema pa traha ku MAN ku a resultá e partido ganadó. Por sierto, PAR a yega di traha kaba ku MAN den gobièrnu na aña 1994. Finalmente el a felisitá sr. Hensley Koeiman ku e viktoria di ayera.

“nos no ta bai pa dividí, ni kibra”

‘PAR a traha duru i kana un kampaña limpi. Nos a bisa ku nos ta bai pa union. Nos no ta bai pa dividí, ni kibra. Tur hende por mira ku nos ta kan’é i pueblo ta huntu ku nos. Bo ta mira den tur enkuesta ku PAR lo bira e gran sorpresa di e elekshon di 2016.”

Asina Zita Jesus-Leito a splika ayera mainta. Jesus- Leito a vota mitar di nuebe na Goiloschool Juliandorp huntu ku un kantidat grandi di kandidatonan riba lista, miembro di partido i fanátikonan.

Jesus-Leito a splika ku PAR no ta traha ku hende konvikto. ‘Ni ku hende ku mente kriminal ku ta buska nan propio saku. Nos no ta traha ku nan. Nos ke traha ku partido íntegro kaminda nos por hiba pueblo na e siguiente nivel. Pa nos e hende di Kòrsou semper ta kana dilanti.”

Jesus-Leito a enfatisá ku partido PAR semper a sòru pa bon gobernashon, ku hendenan kapasitá. ‘Dia PAR tabata den gobernashon, kosnan a kana zetá. Awor aki nos a drenta gobièrnu apénas dies luna, tur hende por mira kuantu kos nos minister Eugene Rhuggenaath di Desaroyo Ekonómiko a hasi. Nos tin direkshon, nos tin vishon nos ta sigui bai.”

Jesus-Leito ayera mainta tabata hopi kontentu kon e kampaña pa elekshon a bai. ‘Si bo ta mira e kantidat di hende ku ta duna sosten na nos, esaki ta hopi positivo. Esaki ta e chèri riba bolo.” Lider di PAR ta spera ku PAR lo haña e mesun 4 asiento ku nan a haña den elekshon di 2012. ‘Si lo tin mas, esaki ta hopi bon.

Bron: Extra