WILLEMSTAD – BREDA. – Juliandro A. di apénas 20 aña no a rel ni trel ora el a tende fiskal den korte na Breda pidi 30 aña di kastigu pa su persona. E demanda despues di kadená perpetuo ta e kastigu mas pisa ku sistema hudisial ulandes konosé.

Hustisia a persiguí e antiano pa un kaso di homisidio kualifiká i/o un intento pa esaki. Fiskal a splika ku e homisidio kualifiká i/o un intento pa esaki tabata pa tapa un otro akto kriminal ku e akusado a kometé, esta kiebro i robo den apartamentu dje víktima, un dama di 68 aña. Juliandro A. a bai hòrta den kas dje víktima i ora esaki a lanta fo’i soño el a hinka Therese Hiwat 41 biaha rònt su kurpa.

Tabatin diferente testigu silensioso ku a permití polis solushoná e kaso i arestá Juliandro A. poko despues dje krímen ku a sagudí komunidat na Tilburg. A haña sanger dje víktima riba yas dje kriminal i a lokalisá su DNA tambe den e apartamentu. Tur esaki a pone ku por a akusá e hóben di 20 aña.

Fiskal den sala di korte a deskribí Juliandro A. komo un peliger masha grandi pa sosiedat i de fakto por bisa ku e no por bin bèk den e sosiedat aki pa motibu ku e ta kapas di ripití e krímen horibel pa kua a pidi 30 aña di prizòn. Fiskal a splika ku derechonan oropeo ta strob’é di pidi bida largu pa e hóben di 20 aña. Juliandro A. a nenga tur kos dia polis a detené i despues a hasi uso di su derechi pa keda ketu.

Bron: Extra