…“mi no ta kulpabel, pero mi tin konsenshi”…

WILLEMSTAD.- Elmer “Kadé” Wilsoe ta bandoná parlamento. Esaki a base di lèkmentu di un rapòrt di RST, kaminda ta señalá sr. Wilsoe komo un dje sospechosonan.

Djasabra anochi den Soberano City, Wilsoe a indiká ku awe djaluna e ta manda karta pa presidente di Staten, no pasobra e ta kulpabel, apsolutamente ku no, di otro banda e ta bisa ku ounke lei ta para na su banda, ku niun hende no por bisé nada den parlamento, e tin un konsenshi.

“Mi tin un prinsipio, un rèspèt di duna parlamento ku niun hende sospechoso no tin lugá pa nan den parlamento. Ta p’esei lo mi pidi na parlamento pa den tempu benidero mi dediká mi mes na prepará mi mes pa e guera i bataya”.

Mas aleu Wilsoe a bisa: “Un dado momentu bo tin di sigui bo konsenshi i prinsipionan i kosnan ku a para p’e, ounke e ta hasi doló i rondó di mi. Tin kos bon i tin kos ku tin di hasi. Pasobra Soberano t’asina e ta. Soberano ta enfrentá tur problema ku kara na laira i no ta doblegá”, Wilsoe a bisa.

Wilsoe a bisa ku e no ke pa niun soberano bira emoshonal. E no ke pa nan rabia. Lokual ta loke, pa nan purba via di su persona dilanti di elekshon pa daña pueblo soberano. P’esei e ta bisa awor “Ban Ben”.

“Mi ke pa e rabia, e frustrashon, e sentido di inhustisia kambi’e den energia positivo. Ounke mi ta sinti inhustisia kontra di mi, esei no ta kita ku lo mi tei, ku mente habri”.

Wilsoe ta insistí ku ounke e ta sinti ku nada di e kosnan no ta bèrdat, e tin obligashon mas grandi na komunidat di duna rèspèt na representashon di pueblo i e órgano mas grandi i haltu ku ta parlamento. Pa doloroso ku e kaminda por ta, i a trompeká, nunka mi no ta doblegá, Wilsoe a indiká. Momentu ku Wilsoe ta anunsiá su desishon, su dos yunan tabata presente komo sosten.

E dokumentashon di kaso Maximus di RST ku lèk ta indiká Wilsoe komo sospechoso number 6 i ku el a duna deklarashon engañoso i kontradiktorio riba su enkuentro na Pier di Mari Pamoen ku Helmin Wiels dia 5 mei 2013. E investigadónan di e kaso ta señalá Wilsoe komo esun ku a duna e lokalidat di afsprak ku e tabatin ku Wiels.

Pa elekshon di par l amento dia 30 sèptèmber awor, Wilsoe ta figura komo number 4 riba lista di Pueblo Soberano.

Bron: Extra