WILLEMSTAD.- Korte ayera a pospon’é kaso di atrako armá ku violensia den bibienda pa di 3 biaha. Esaki pa motibu ku e investigashon ta inkompleto. Hues a bisa di ke mas informashon di e investigashon pa haña mas klaridat den e kaso.
Esaki mirando ku falta hopi detaye mas ku e no ta mirando den e map di dokumento. Ta trata di un kaso kaminda 2 hòmber venezolano i 2 yu di Kòrsou ta sospechá di tabata involukrá. E hòmber nan Ingomar Calvenhoven (26), Wendell Dovale(21) di Kòrsou i tambe Cesar Villavicencio (25) i Yahn Lugo Vargas di Venezuela ta esnan sospechá den e kaso aki. Nan ta keda akusá ku dia 15 di yüni 2016 nan lo mester a drenta den bibienda di un famia na Castorweg, kaminda nan lo mester a kometé un atrako brutal.
Aki nan a menasá miembronan di e famia ku arma di kandela i a bai ku vários hoya balioso, telefònnan selular, un pòtmòni ku 3 florin aden. Durante ku nan tabata kometé e atrako, polisnan a yega rápido na e sitio despues di a haña informashon. E hòmbernan aki mes ora a sali na kareda i a laga vários kos kai durante nan fuga. Polisnan a konfiská máskara, hanskun, arma di kandela i otro artefaktonan ku ta keda uzá den atrako. Polis a logra gará Calvenhoven, Dovale i tambe Villavicencio.
E dos yunan di Kòrsou a kore bai skonde tras di un muraya nèt den serkania di e bibienda. Segun hues entre otro tin dos diferente prosèsverbal di dos diferente verbalisante. Un di nan ta bisa ku e víktima a rekonosé e oloshi ku a keda konfiská serka un di e akusadonan, miéntras e otro prosèsverbal ta bisa ku e denunsiante no a rekonosé e oloshinan. Hues a bisa di ke sa mas di e esaki, si tabatin mas di un oloshi ku a keda hòrtá. Segun hues e tabata kier mas informashon di e telefònnan ku a haña den kamber di hotèl kaminda e venezolanonan tabata keda.
A resultá ku e telefònnan aki tabata prosedente di e atrako. Segun hues no tin niun prosèsverbal di e armanan ku a keda konfiská ni niun reportahe di e yamadanan di telefòn ku a keda hasí entre e akusadonan. Mirando tur esakinan hues a bisa ku e ta duna Ministerio Públiko chèns kaba di hasi investigashon riba e loke nan e kier sa i tambe e abogadonan pa kaba di studia e kaso. Mirando esakinan korte a duna di konos’é ku dia 31 di mart e kaso por keda tratá den su kontenido.
Bron: Extra