Extra | Kaso Maximus awe den korte apelashon

Kaso Maximus awe den korte apelashon | Extra

WILLEMSTAD.- Awe for di un dia ku no sa ta normal pa tratamentu di kasonan den korte Superior, e kaso Maximus lo keda presentá. E akusado Burney “Nini” Fonseca kondená na un kastigu di 25 aña, a apelá su sentensia di kual awe pa mitar di 10 e kaso lo bin dilanti e tribunal konsistí di 3 hues.

Su abogado mr Marije Vaders a pidi pa posponé e kaso pa un otro fecha, pa asina e kaba di hasi algun detaye.

Nini ta keda akusá di ta esun ku a reglá e pago pa asesiná e lider polítiko Helmin Wiels dia 5 di mei 2013.

Hues Paulides ku ta esun ku a trata e kaso, a bisa den su veredikto ku korte ta haña probá ku dia 5 di mei 2013 Fonseca huntu ku otronan intenshonalmente a premeditá asesinato di Helmin Wiels ku arma di kandela.

Segun e veredikto, e envolvimentu di e akusado den e kaso, a keda probá abase di 4 pila ku tabata deklarashon di 3 testigu i mensahenan entre e akusado i George Jamaloodin.

Hues a bisa ku kada unu di e pilarnan riba nan mes por ta insufisiente, pero si konektá nan na otro esaki ta forma un konstrukshon ku ta bira mas ku sufisiente pa probá e deklarashonnan. Durante tratamentu di e kaso Ministerio Públiko a trese e akusado Elvis Kuwas alias Mònster Kòrsou pa testiguá. Manera e mes a deklará Kuwas ta esun ku a asesiná Wiels ku 9 bala e atardi ei na Pier Maripampun.

Kuwas a deklará entre otro di a kana bai den garashi serka Pretu i a topa Fonseca para, di kual esaki a bisa Pretu pa “hèndel ku e gai nan” i bira bai.

Tambe Kuwas a deklará di a para na kas di Pancheck i mira Fonseca trese tas di plaka pa Pretu.
Abogado Marije Vaders den su defensa a para riba for di prinsipio ku no tin niun prueba kontra su kliente.

Segun e abogado Kuwas ta un testigu inkonfiabel, mirando kuantu bes el a kambia su deklarashonnan anteriormente.

E abogado durante tratamentu den korte di promé instansia, a puntra Kuwas si el a firma dokumento ku Ministerio Públiko.

Kuwas riba un tono hopi indigná a respondé di nunka a sera niun dil ku OM. Pa loke ta trata e mensahenan e abogado a duna di konosé ku no tin nada ku ta inkrimá su kliente den esakinan.

Tambe e abogado a bisa ku ta imposibel pa para na kas di Panchek i mira te den kura di Pretu.
Segun e abogado su kliente a keda apsolvé den kaso Magnus pa e mesun akusashonnan ku kaso Maximus i ku no tabatin nada nobo.

Awe ta bai tende e fecha nobo ku e kaso lo keda trata den korte Superior.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *