WILLEMSTAD.- Korte awe na Kòrsou ta trata un kaso sumario di karakter sivil ku abogado Eldon ‘Pepie’ Sulvaran a entamá kontra gobernadornan di Kòrsou i St. Maarten i kontra gobièrnunan di ámbos pais outónomo den reino.
E abogado a kuminsá e kaso pa evitá ku gobernadornan Lucille George-Wout i Eugene
Holiday ta firma e dokumento di ekstradishon di siudadanonan Rogelio Koeiman, Kamala Felicia i Ronchie Rietwijk pa Merka kaminda hustisia merikano ta akusá e trio di tabatin embolbimentu sustansial den por lo ménos dos lote di kokaina ku nan a pone riba teritorio merikano. E kaso aki a kuminsá na 2013 ora hustisia merikano fo’i nan despacho na New York a pidi asistensia di outoridatnan di Kòrsou pa aresto i ekstradishon dje trio ya menshoná.
E momentonan ei a start un berdadero bataya hurídiko ku un serie di kaso ku pasa korte, korte di apelashon i asta bai kaba den kasonan den kasashon. Finalmente algun siman pasa korte a diktá ku ekstradishon di Rogelio Koeiman, Kamala Felicia i Ronchie Rietwijk ta hustifiká i por bisa ku e kareda hurídiko a terminá pa nan. Mesora a detené Rogelio Koeiman na St. Maarten kaminda el a bai biba entretantu. Aki na Kòrsou a detené Kamala Felicia i ta buskando Ronchie Rietwijk envano te ainda. Nos tin entendí ku e kaso sumario di karakter sivil lo keda trata kontra e dos paisnan i nan gobernadornan komo e outoridat ku mester firma e asina ‘bevel van uitlevering’.
Bron: Extra