WILLEMSTAD.- Mr. Geert Jan Knoops ayera a pidi korte pa tende entre otro eks hefenan di VDC i MOT respektivamente sr. Edsel Gumbs i Kenneth Dambruck. Tambe Abogado General (AG) mr. van der Schans, i un hòmber Robert Pelicaro na Italia riba asuntu di mail.
E petishonnan a keda hasi den “regiezitting” di kaso Babel, unda e lider polítiko di MFK Gerrit Schotte i su partner Cicely van der Dijs ta den sala di korte di apelashon.
Pa mustra kon henter investigashon kontra di Schotte a kuminsá i ku a yega na e kaso, loke ta inhustu. Hasta riba kada un dje investigashonnan mr. Knoops a pidi pa deklará OM no atmisibel.
Mr. Knoops a bisa ku dia 29 sèptèmber 2010, gobernadó mr. van der Pluijm-Vrede a pidi investigashon di antesedente di Schotte na VDC. Gobernadó no tin ningun outoridat pa pidi esaki, i ménos duna instrukshon na Prokurador General pa hasi tal investigashon. P’esei e investigashon ku prokurador general a presentá, pasobra esaki no tin niun base.
Segun e abogado den un kombersashon ku Gumbs tabatin ku lider di MAN, Charles Cooper, lider di PS, Helmin Wiels i Schotte a bisa nan ku loke gobernadó ta pidi no ta korekto. Pero despues Gumbs ta haña instrukshon di gobernadó pa hasi investigashon i den e kuadro aki e ta manda 4 karta pa instansianan ku tin di aber ku Schotte entre otro Orco Bank. Aki a haña informashon riba situashon finansiero di Schotte.
Sinembargo e informashon aki ku tabata bon wardá a bira públiko. “Kon por ta ku informashon ku tabata den kluis di VDC por a sali bira públiko. Ta VDC mes a lèk informashon”, di akuerdo ku mr. Knoops.
Den luna di yüli 2012, e organisashon FAS a pidi investigashon di MOT meldingnan di Schotte. FAS ta traha ku ministerio públiko den kaso di Enkuesta Sivil, e abogado a remarká.
Dia 28 yüni 2012 prokurador general a skirbi karta ku no a investigá e MOTnan debí ku tabatin falta di sufisiente polis pa kondusí e investigashon. Pa e abogado nunka esaki por ta un esküs. For di aki tin un start falsu di investigashon Babel.
21 mei 2013 landsrecherche ta kuminsá ku investigashon for di MOT melding nan i un luna despues ta kambia e investigashon den unu penal.
Teniendo kuenta ku tur e historia aki, mr. Knoops a pidi korte pa tende e eks hefe di VDC sr. Edsel Gumbs, sr. Dambruck eks hefe di MOT.
Tambe abogado general mr. van der Schans kende ta bisa di a haña un mail for di Italia serka outoridatnan hudisial, i ta esaki a kondusí na investigashon. Pero no por haña e mail aki niun kaminda. Den e asuntu di mail Robert Pelicaro lo por duna mas informashon.
Tambe mr. Knoops a kuestioná e denunsia anónimo. Segun e defensor un investigashon no por start ku un investigashon anónimo i ta dikon Ministerio Públiko a inkluí e deklarashon aki den dokumentonan.
Bron: Extra