WILLEMSTAD. – Mirando e echo ku otro siman tin elekshon pa un parlamento nobo, Parlamentario Sra. Omayra Leeflang no a mira otro opshon pa logra haña kontesta riba su pregunta hasí na Parlamento tokante e posibel malversashon kometé pa Marvelyne Wiels, a dirigí su mes na Ministerio Públiko ku un keho entregá.
Den un keho entrega na Ministerio Públiko fechá 23 di sèptèmber 2016, Sra. Leeflang a basá su keho riba e echo ku konforme e dokumento di SOAB,16/0498C.JH, ta indiká riba página 16 bou di e di sinku punto di atenshon ku e kuenta 56.94.22.124, tin un suma di 235.322,06 euro ku a somentá sin ku por saka afó na unda e plaka aki a bai.
Relashoná ku e nota aki den e dokumentu di SOAB, Leeflang den su kalidat komo Parlamentario a hasi pregunta na Parlamento tokante e suma di plaka aki.
Preguntanan mester a keda kontestá pa Minister Presidente, pero e reunion enkuestion a keda suspendé i nunka mas no a kontinuá ku e reunion spesífiko aki. P’esei Leeflang ta di opinion ku komo representante di pueblo i kumpliendo ku e loke el a huramentá p’e, no a ked’e nada otro di entrega un keho na Ministerio Públiko kontra di Marvelyne Wiels pa malversashon di 235.322,06 euro. Manera ariba menshoná, otro siman tin elekshon pa un parlamento nobo i esei ta nifiká ku e parlamento aki no ta den poseshon mas pa kontesta e preguntanan hasí. Leeflang a añadí ku e ta spera ku Ministerio Públiko por atendé e keho aki den un forma adekuá.
Bron: Extra
